Шымкент. Қазіргі уақытта отбасылық мәселелер өте көп болып отыр, олардың ішінде екі жақтың келіспеушіліктері жиі кездеседі.

  Қазіргі уақытта отбасылық мәселелер өте көп болып отыр, олардың ішінде екі жақтың келіспеушіліктері жиі кездеседі. Ұрыс-керіс, ұрып-соғу сияқты жағдайлар да көп. Иә, әрине, қазақ атам айтқандай, «ыдыс-аяқ сылдырламай тұрмайды», алайда... Гендерлік теңдік стратегиясы дегенде біздің ойымызға тек әйелдердің құқығын қорғау түсінігі келетіні анық. Бірақ шындығында, бұл құжатта әйелдер мен ерлердің мүмкіндіктері теңдей қарастырылған. Сонымен қатар, қазіргі таңда көптеген әйелдер ер адамдармен теңбіз деп ойлайды. Кейбір отбасыларда ер адам емес, әйел адам жұмыс істеп, отбасын асырайды. Бұл жағдай жанжалға, ұрып-соғуға немесе тұрмыстық зорлық-зомбылыққа әкелуі мүмкін.

  Күйеуінен таяқ жеп жүрген әйелдер бұл мәселеге назар аудармаса да, мемлекет тұрмыстық зорлық-зомбылыққа қарсы бірқатар шаралар қабылдады. Мемлекет басшысы Қасым-Жомарт Тоқаев өткен жылғы «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауында әйелдер мен балаларға қарсы зорлық-зомбылық үшін жазаны күшейтуді тапсырды. Президенттің тапсырмасымен биылдан бастап жыныстық қатынасқа қатысты қылмыстар ауыр қылмыс санатына енді. Енді бұл қылмыстық істер тек сотқа жіберіледі, яғни бұрынғыдай жәбірленуші мен қылмыскердің татуласу мүмкіндігі болмайды. Мысалы, қызметтік міндетін атқару кезінде жасаған зорлау 9 жылдан 12 жылға дейін бас бостандығынан айыруға әкеп соғады (бұрын 5 жылдан 10 жылға дейін болатын).

  Қазіргі таңда отбасында жанжал болған жағдайда, балалар зардап шегетін болса, заң жүзінде ата-ана құқығынан айыру да мүмкін. Өйткені, мұндай отбасында өсіп келе жатқан баланың ойлау жүйесіне бұл жағдайлардың кері әсер етуі ықтимал. Соңғы үш айда «Зорлық-зомбылық нәтижесінде ауыр жағдайға тап болған жандарды баспанаға алатын Дағдарыс орталығының» сенім телефонына тұрмыстық зорлық-зомбылық көрген отыздан астам әйел қоңырау шалған. Астана қаласының Ішкі істер басқармасының жергілікті полиция қызметінің мәліметтері бойынша, үйдегі зорлық-зомбылық құрбандарының саны екі есе өскен. Олардың ішінде 18 әйел адам Дағдарыс орталығының баспанасына жіберілген.


Тілші : Журсынбай Аружан Сабырқызы