Бозарық және Ақжайық шағын ауданындағы құрылыс

Шымкент қаласы әкімінің орынбасары Н. Ергешбек Бозарық және Ақжайық шағын ауданындағы құрылысы жүргізіліп жатқан тұрғын үйлердің құрылыс барысын бақылады.
Қала әкімі орынбасарының төрағалығымен және мердігер мекеме өкілдерінің қатысуымен жиналыс ұйымдастырылып, жиын қорытындысымен жауаптыларға құрылыс сапасына қатаң назар аударуды тапсырды.

Сонымен қатар, құрылыс жұмыстарын бекітілген өндірістік жұмыс кестесіне сәйкес жүргізу қажет екендігін ескертті.
Ел Президенті Қасым-Жомарт Тоқаев әлеуметтік әл-ауқаттың тұрғын үй мәселесімен тікелей байланысты екенін және тұрғын үй құрылысы әлеуметтік мәселелерді шеше отырып, экономикалық өсімнің локомотиві бола алатынын айтқан болатын. Мемлекет басшысының тапсырмасына сәйкес Шымкентте соңғы жылдарда  арнайы бағдарламалар есебінен көпқабатты тұрғын үйлердің құрылысы қарқынды жүргізілуде. 
Үкімет  қаулысымен бекітілген Тұрғын үй-коммуналдық инфрақұрылымды дамытудың 2026 жылға дейінгі тұжырымдамасы аясында 2023 жылы құрылыс басқармасы тарапынан мемлекеттік бюджеттен 312,4 мың шаршы метрді құрайтын  4 090 пәтерлі 98 көпқабатты тұрғын үйдің құрылысын жүргізу жоспарланған. Бүгінде Бозарық мөлтек ауданында 54 үй, Ақжайық мөлтек ауданында 26 үй салынуда. Өндірістік кестеге сәйкес 67 тұрғын үйдің құрылысы аяқталып жыл соңына дейін ел игілігіне пайдалануға беріледі. Оның 61-і кредиттік, 6-ы арендалық баспаналар. 

Елімізде баспананы қолжетімді ету – жергілікті әкімдік тарапынан жүзеге асырылып жатқан басты стратегиялық жоспарлардың бірі.

Ақпарат көзі: kurylys.shymkent  және Informburo.kz