Түркістан облысы. «Қауіпсіз ел» ұлттық жобасы әрбір азаматқа бейбіт өмір мен қауіпсіз орта қалыптастыруды мақсат етеді.

«Қауіпсіз ел» ұлттық жобасы әрбір азаматқа бейбіт өмір мен қауіпсіз орта қалыптастыруды мақсат етеді. Бұл жоба арқылы еліміздегі қауіпсіздік деңгейін арттырып, қылмысты азайту көзделген. Халықтың өмір сапасын жақсарту және қоғамдық қауіпсіздікті нығайту — жобаның басты бағыты.

Жоба аясында бірінші кезекте құқық қорғау жүйесін реформалау қолға алынды. Полиция қызметін жаңарту арқылы халықпен тығыз байланыс орнатып, олардың сенімін арттыру жоспарланған. Әлеуметтік сауалнамалар бойынша, азаматтардың құқық қорғау органдарына сенімі төмендеу екенін көруге болады, сондықтан бұл салада айтарлықтай өзгерістер қажет. Қызметкерлердің кәсіби деңгейін арттыру, оларды қоғаммен жұмыс істеуге дайындау арқылы қылмысты болдырмауға бағытталған жұмыстар атқарылып жатыр. Осылайша, полиция қызметкерлері халықтың сеніміне кіріп, құқық бұзушылықтың алдын алуға тырысады.

Екінші маңызды бағыт — төтенше жағдайлардың алдын алу және халықты қорғау шараларын күшейту. Қазақстанда табиғи апаттар, өрт, су тасқыны сияқты қауіптер бар. Сол үшін төтенше жағдайлар қызметінің дайын болуы маңызды. Құтқару қызметтері, өрт сөндіру бөлімдері жаңартылып, қажетті құралдармен қамтамасыз етілуде. Халықты қауіпсіздік шаралары туралы хабардар етіп, алғашқы көмек көрсету тәсілдерін үйрету де маңызды іс-шаралардың бірі болып отыр.

Жол қауіпсіздігін арттыру — жобаның тағы бір маңызды бағыты. Қазір жол-көлік оқиғалары жиі кездеседі. Сондықтан бұл бағытта жол инфрақұрылымын жақсарту, жылдамдықты бақылау жүйелерін орнату қолға алынған. Бұл шаралар жүргізушілер мен жаяу жүргіншілердің қауіпсіздігін қамтамасыз етуге көмектеседі.

Балалардың қауіпсіздігін қорғау мақсатында мектептерде бейнебақылау жүйелері орнатылып, қауіпсіздік шаралары күшейтілуде. Балалардың қауіпсіздігі қоғам үшін маңызды мәселе болғандықтан, ата-аналар, мектеп және құқық қорғау органдары бірлесіп жұмыс істеуде. Мектептер мен қоғамдық орындарда балаларды қауіпті жағдайлардан қорғау, оларға қауіпсіздік ережелерін үйрету бойынша шаралар жүргізіліп жатыр.

Сонымен қатар, жоба ақпараттық қауіпсіздікті қамтамасыз етуді де көздейді. Қазіргі уақытта интернет алаяқтық, дербес мәліметтерді ұрлау сынды киберқылмыстар көбеюде. Осыған байланысты құқық қорғау органдары интернет қауіпсіздігін күшейтуде. Азаматтарға интернетте қауіпсіздікті сақтау, жеке мәліметтерін қорғау жолдары туралы ақпарат беру де маңызды іс-шаралар қатарына кіреді.

Қоғамдық тәртіпті сақтау, әсіресе адамдар көп шоғырланатын орындарда, қауіпсіздік деңгейін арттыруға бағытталған. Парк, саябақ, демалыс орындарында бейнебақылау орнатылып, құқық қорғау қызметкерлерінің жұмысы жақсартылуда. Бұл шаралар адамдардың өзін қауіпсіз сезінуіне, қоғамдық орындардағы құқық бұзушылықты азайтуға көмектеседі.

Қылмыс деңгейін төмендету мақсатында қылмыстық істерді тергеу сапасын арттыру, азаматтардың құқықтарын қорғау, құқық қорғау органдары қызметкерлерінің кәсіби біліктілігін арттыру бағытында арнайы оқыту курстары ұйымдастырылуда. Осы арқылы құқық қорғау органдарының жұмысын тиімді ету көзделіп отыр.

Жалпы, «Қауіпсіз ел» ұлттық жобасы халықтың өмірін қауіпсіз етіп, жайлы ортада өмір сүруге жағдай жасауға бағытталған. Ел тұрғындары бұл жобаның арқасында қауіпсіздік мәселелерінде өздерін сенімдірек сезінеді. Қауіпсіздікті қамтамасыз ету тек мемлекет тарапынан ғана емес, әрбір азаматтың белсенді қатысуын талап етеді.

Тілші: Түймебай Аяжан Лениншілқызы