Шымкент: Инженерлік инфрақұрылыммен қамтамасыз етуді 100 пайызға жеткізу көзделуде.

 Шымкент: Инженерлік инфрақұрылыммен қамтамасыз етуді 100 пайызға жеткізу көзделуде. Бұл туралы Орталық коммуникациялар қызметінің брифингінде Шымкент қаласының әкімі Ғабит Сыздықбеков атап өтті.
  Шымкенттің инженерлік инфрақұрылымы — бұл қаланың әлеуметтік-экономикалық кешенін қамтамасыз ету үшін қажетті көлік, су шаруашылығы, энергетикалық және басқа да коммуникациялар мен мекемелердің жиынтығы. Бұл жүйе қала тұрғындарының жайлы өмір сүруін қамтамасыз ететін өте маңызды әрі күрделі құрылым болып табылады. Шымкент қаласының әкімдігі мен жауапты мемлекеттік органдар өздерінің құзыреті аясында осы бағытта тұрақты жұмыстар жүргізуде.

  Қаладағы бизнес субъектілерін және тұрғындарды сапалы электр энергиясымен қамтамасыз ету, энергия жабдықтауда үзілістерді болдырмау — мегаполистің әлеуметтік-экономикалық әлеуетін әрі қарай дамыту үшін стратегиялық маңызы бар мәселелер. Инженерлік жүйелер жыл сайын жақсартылып, кеңейтілуде. Осы жылдың өзінде бірқатар маңызды жобалар жүзеге асырылып жатыр:
—Су жүйесін жақсарту: Сайрам және Курсай елді мекендерінде 60 мыңнан астам тұрғынды сапалы ауыз сумен қамтамасыз ету жұмыстары басталды.
—Жаңа құрылыс алаңдарын дамыту: 4 елді мекенде жаңа құрылыс алаңдары пайда болды, ал Асар-2 мөлтек ауданында 6 мыңнан астам тұрғынды қамтитын жаңа микроаудан іске қосылды.
—Электр қуатын арттыру: Асар-2, Сайрам, Курсай, Бозарык аймақтарында электр қуатын арттыру үшін екі жаңа электр стансасының құрылысы басталды (Акжар 110 кВ, Туран 10 РП).
—Қаладағы өндірістік қуаттар мен халық санының өсуіне байланысты, бұл электр стансалары мегаполистің энергия қажеттіліктерін толық қанағаттандыруды мақсат етеді.
—Табиғи газбен жабдықтау: 12 елді мекенде табиғи газ жүйелері құрылыс жұмыстары басталды, оның ішінде Кайнарбулак, Каратобе және Бозарык сияқты елді мекендерде 60 мыңнан астам адамды қамтитын газ жүйесі тартылады. Жыл соңына дейін тағы 3 елді мекен газбен қамтылады.
—Канализация жүйесін кеңейту: 2 магистральды кәріз коллекторының құрылысы жүргізілуде (Тураннан КОС-қа дейінгі магистральді коллектор және Шымсити кәріз коллекторы), сонымен қатар 6 қосымша объекті (Мирас-Шапагат-2, Нуртас, Туран, Айкап, Кайтпас-1, Солтүстік-Батыс) салынып жатыр.
—Бұл жобалар нәтижесінде 120 мыңнан астам адамның тұрғылықты жері канализация жүйесіне қосылады.
Шымкенттің демографиялық өсуін және өндірістік алаңдардың кеңеюін ескере отырып, инженерлік инфрақұрылымды одан әрі дамыту жоспарлануда. Келесі жобалар іске асырылмақ:
-6 жаңа су қоймасын салу;
-7 жаңа электр станциясын (подстанция) салу;
-1 АГРС (автогаз реттегіш станциясы) салу;
-1 жаңадан су тазарту ғимаратын салу.
  Бұл жобалар қаладағы инженерлік инфрақұрылымның қуатын арттырып, тұрғындардың сапалы өмір сүру деңгейін жақсартуға мүмкіндік береді.
  Қаланың инженерлік инфрақұрылымын жетілдіру бойынша қолға алынған жобалар Шымкенттің тұрақты дамуына және тұрғындардың өмір сапасын арттыруға бағытталған маңызды қадамдар болып табылады. Электр қуатын, су мен газ жүйелерін жақсарту, жаңа тұрғын алаңдары мен өндірістік аймақтарды дамыту қала экономикасын нығайтып, оның әлеуметтік қажеттіліктерін толық қанағаттандыруға мүмкіндік береді.
    Елімізде жүзеге асып жатқан энергетикалық даму бағдарламасының маңызды бір бөлігі – газдандыру. Шымкентте газдандыру жұмысы қарқынды жүзеге асырылуда. Қала тұрғындарымен кездесуде энергетика вице-министрі Ерлан Ақкенженов шаһарда табиғи газ 1 миллионнан астам адам үшін қолжетімді, яғни көгілдір отынмен қамту деңгейі 99,9 пайызға жеткенін атап өткен еді. Жоспарға сәйкес, биыл 9 жоба қолға алынып, кезең-кезеңімен жүзеге асырылуда. Соның нәтижесінде жыл соңына қарай 80 мыңнан астам адам көгілдір отынмен қамтылып, газдандыру деңгейі 100 пайызға жетуі тиіс. Мұның бәрі жай ғана есеп емес, нақты жүзеге асып жатқан шаруа. Бұған қараша айында қаладағы үш шағын ауданның табиғи газға қосылуы дәлел.
  Ең алдымен 60 мыңнан астам адам тұратын Қайнарбұлақ тұрғын алабы газға қосылды. Мұнда газ құбырының құрылысы 2022 жылы басталған. Алайда жекелеген учаскелерде жұмыс баяулап, мердігерлердің кесірінен жобаны аяқтау мерзімі ұзарып кетті. Сондықтан Ғабит Сыздықбеков жауапты тұлғаларға газ құбырын пайдалануға беруді жеделдетуді тапсырды. Сөйтіп қараша айының басында Қайнарбұлақ тұрғындары табиғи газға қосылу мүмкіндігіне ие болды.
Көп ұзамай Қаратау ауданындағы 10 мыңға жуық халқы бар Бозарық тұрғын алабына да газ берілді. Бұл газ құбырының құрылысы 2023 жылы басталған.
   Қала әкімі Ғабит Сыздықбеков тұрғындармен әңгімелесу кезінде газдандыру кез-келген қаланың дамуындағы аса маңызды қадам екенін атап өтті. Газбен қамтамасыз ету мегаполистің экологиясын айтарлықтай жақсартуға ғана емес, сонымен қатар тұрғындарға қолайлы жағдай жасауға мүмкіндік береді. Сондай-ақ ол газды пайдалану кезінде сақтық шараларын сақтауға шақырды.
   Қаратөбе тұрғын алабына кезек келгенде де шаһар басшысы жергілікті халықпен бірге газды іске қосу шарасына қатысты. Ғабит Сыздықбеков әр елді мекеннің газдандырылуы экологиялық тұрақты орта құру және қолайлы жағдай жасау жолындағы маңызды қадам екенін атап өтті. Шаһар басшысы: «Газ көмір мен ағашты отын ретінде тұтынуды азайтып, тұрмысты жеңілдетеді. Газдандыру – басым бағыттың бірі, сондықтан біз Шымкенттің әр ауданында осы маңызды ресурсты қолжетімді ету бағытындағы жұмысымызды жалғастырамыз», — деп атап өтті.
  Жұрт осыған дейін қыста көмір мен ағаш жағып, оған қоса газ баллонын сатып алатын. Күнделікті тұрмыста бұл әжептәуір қиындық туғызатын, әрі қауіпті еді. Сондықтан көгілдір отынға қолы жеткен тұрғындардың қуанышында шек жоқ екені айтпаса да түсінікті. «Бұрын сұйытылған газ бен көмірді жағушы едік, ол қымбатқа түсетін. Әрі машақаты көп. Енді көмір іздеп шапқыламаймыз, газ баллонын сатып алмаймыз. Қолымыз босап, тұрмысымыз жеңілдеп қалды», — дейді олар. Қалтаға салмақ түспейтіні өз алдына.
  Осылайша Шымшаһарда тұрғын үйлерді газдандырудың екінші кезеңі аясында 700-ге жуық абонент көгілдір отынға қол жеткізді. Жыл соңына дейін Ынтымақ-2, Тассай және Қаратөбе шағын аудандарын газдандыруды аяқтау жоспарлануда.
Ал ұзақ мерзімді жоспарға сәйкес, Шымкент әкімдігі барлық аудандарды газдандыруды көздеп отыр. Бұл қала инфрақұрылымын дамытудағы қарышты қадам болуымен қатар, экологиясын жақсартуға сеп болатыны сөзсіз.

Тілші: Кенжебаева Гаухар Жақыпқызы