Шымкент. Гендерлік саясат туралы сөз қозғалғанда қоғам екіге бөлінеді

  Гендерлік саясат туралы сөз қозғалғанда қоғам екіге бөлінеді. Гендерлік теңдікті көбі «әйелдің билікке таласуы» деп қабылдайды. Өйткені, Хорватия, Литва, Бангладеш, Жаңа Зеландия, Словакия, Грузия, Грекия сияқты елдерді қазір әйелдер басқарады. Үкімет басқарған әйелдердің саны да аз емес. Былтыр 34 жастағы Санна Марин Финляндияның Премьер-министрі қызметіне тағайындалды. Бұл скандинав елінде сонау 1907 жылы депутаттардың 10 пайызын әйелдер құраған. Ал, «бір қолымен бесікті, екінші қолымен әлемді тербеген» бұл әйелдерге қоғам үрке қарайды. «Әйелі ерінен бір саты төмен тұратын отбасында береке болады» деп санайтын қоғамды бұл көзқарасы үшін жазғыруға да болмас. Дегенмен, гендерлік саясат әйелдерді билік басына әкелумен ғана шектелмейді. Оның басты мақсаты – нәзік жандылардың құқығын қорғау.  Әлемнің 143 елінде ерлер мен әйелдердің теңдігіне конституциямен кепілдік беріледі. Ал, Біріккен Ұлттар Ұйымына (БҰҰ) мүше әлемде 193 тәуелсіз мемлекет барын ескерсек, 50 елдің мұндай заңды қабылдауға асықпай отырғанын байқаймыз. Гендерлік саясат әйелдерге тең қолжетімділікті және өмірдің барлық салаларына қатысуды қамтамасыз етуі қажет.

  Бүгінде әйелдер саясатта, бизнесте, экономиканың барлық салаларында ер- азаматтармен қатар еңбектеніп, қабілет дарынымен, іскерлігімен көзге түсіп қана қоймай, мемлекетіміздің өсіп-өркендеуіне өз үлестерін қосуда. Халықаралық ареналарда әйелдердің саяси көшбасшылығы уақыт өткен сайын айқындалып келеді. Жалпы, әйел заты қазақ қоғамында қашанда ардақты саналған.

Елбасымыздың гендерлік саясатқа көңіл бөлуі жақсы көрсеткіштерге алып келетіні сөзсіз. Әйелдер өздерінің жеке басының әлеуеті мен адами әлеуетін іске асыра отырып, әлеуметтік дамудың барлық процестеріне тең дәрежеде қатысатын болады. Осының бәрі елдегі азаматтық қоғамның одан әрі жетілуіне ықпал ететіні сөзсіз. Оның негізгі міндеті — отбасына, әйелдер мен ерлердің теңдігіне қатысты кешенді мемлекеттік саясатты іске асыру. Қазақстанда гендерлік саясат жүргізу жөніндегі жұмысты Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссия үйлестіреді.

Тілші: Тұрсынхан Жанерке Ерлданқызы