Шымкентте бұрынғы қоқыс полигоны орнында экопарк құрылысы басталды

Шымкенте бұрынғы қоқыс полигоны орнында экопарк құрылысы басталды

  Шымкент қаласында Достық шағынауданында бұрынғы қоқыс полигоны аумағында Экопарк құрылысы басталды. Қала әкімі Ғабит Сыздықбековтің тапсырмасымен жүзеге асып жатқан жоба аясында 45 гектар аумақ жасыл аймаққа айналады, оның 38,6 гектары көгалдандыруға бөлінеді. Жоба бойынша табиғи материалдар пайдалану, табиғи ландшафтқа сәйкес велосипед жолдарын салу, көмірқышқыл газын шығаратын құбырларды қолайлы түрде жүргізу жоспарланған.

 Экопарк тұрғындар мен қонақтар үшін 9 ашық демалыс аймағын, оның ішінде ойын алаңдарынан спорт нысандарына дейін ұсынатын болады. Сонымен қатар, 10 шақырымдық серуендеу жолында 4000-нан астам жапырақты ағаш отырғызылып, табиғи оазис атмосферасы қалыптасады. Қалдықтар үстіне органикалық тыңайтқыштармен байытылған 1,5 метр топырақ қабаты салынады.

  Жобаның жалпы құны 5 миллиард теңгені құрап, бас демеуші ретінде Hexo Foundation компаниясы қатысып отыр. Құрылыс жұмыстарының аяқталуы 2025 жылдың соңына жоспарланған. Барлық жұмыстар бизнестің әлеуметтік жауапкершілігі аясында жүргізілуде. Осы жылдың көктемінде полигонда ауқымды дайындық жұмыстары басталды: 250 000 текше метр топырақ төселді, 120 метр тереңдіктегі бес ұңғыма бұрғыланды, және 500 метр қоршау орнатылды. 
тілші: Кенжебаева Гауһар