2) ШЫМКЕНТТЕ СПОРТ МЕКТЕБІНІҢ ЖАҢА ҒИМАРАТЫ ПАЙДАЛАНУҒА БЕРІЛДІ

ШЫМКЕНТТЕ СПОРТ МЕКТЕБІНІҢ ЖАҢА ҒИМАРАТЫ ПАЙДАЛАНУҒА БЕРІЛДІ

  Шымкентте №15 Жекпе-жек түрлерінен кешенді олимпиада резервінің мамандандырылған балалар-жасөспірімдер спорт мектебі ашылды. Жаңа спорт нысанының ашылуына қала әкімі Ғабит Сыздықбеков қатысып, ғимаратты аралап, спорт мектебінің қызметкерлерімен кездесті. Мегаполис басшысы осындай маңызды жобалардың жастар арасында спортты дамыту мен салауатты өмір салтын қалыптастыруға зор ықпал ететінін атап өтті.

  Спорт мектебі көптеген республикалық және халықаралық жарыстарда жоғары нәтижелерге қол жеткізген майталман спортшыларды тәрбиелеген. Мысалы, Елена Шалыгина мен Софья Берульцева сияқты танымал спортшылар осы мектептің тәрбиеленушілері болды. Жаңа төрт қабатты спорт кешені 2400 шаршы метрден астам аумақты алып жатыр. Онда грек-рим және еркін күрес, дзюдо, кикбоксинг, каратэ, самбо және фитнес сабақтары үшін арнайы жабдықталған алты мамандандырылған зал бар.

  Бұл жаңа нысан Шымкентте жас спортшылардың физикалық дайындығын арттырып, олардың алдағы жарыстарда үлкен жетістіктерге жетуіне ықпал етеді. 
Тілші: Кенжебаева Гаухар Жақыпқызы