ТҰРАН АУДАНЫ: 5 МЫҢНАН АСА АБОНЕНТ КӨГІЛДІР ОТЫНҒА ҚОСЫЛДЫ

Тұран ауданына қарасты Ақтас және Ақтас-2 елді мекендерінің тұрғындары күні кеше көгілдір отынға қол жеткізді. Құжаттары дайын тұрғын үйлерге рет-ретімен табиғи газ беріліп жатыр. Жалпы 2023 жылдың 10 айының қорытындысымен, Тұран (2-3 кезек), Бозарық, Асар-2, Сәуле, Ақтас-1 және Арғымақ шағын аудандарында табиғи газ желісінің құрылыс жұмыстары аяқталып, 5 мыңнан астам абонент табиғи газбен қамтылды. 
– Тұран ауданындағы газдандыру көрсеткіші жыл соңына дейін 98 пайызға жетеді. Ендігі жерде Құрсай және Жаңаталап елді мекендерінің жаңақұрылыс аумақтарын газдандыру бойынша жобалық-сметалық құжаттамасын әзірлеп қойдық. 2024 жылы құрылыс жұмыстары басталады. Сонда 2025 жылға газбен қамтамасыз етілмеген тек Айкөл елді мекені ғана қалып отыр. 2025 жылы Айкөлге де газ жеткізсек, Тұран ауданында газ мәселесі толық шешіледі, – дейді Тұран ауданының әкімі Боранбай Булатбеков. 
Қазіргі таңда Қайнарбұлақ елді мекенінде мердігер мекеме «Отау Строй» ЖШС тарапынан 1-ші және 2-ші кезең құрылыс жұмыстары жүріп жатыр. Тәуелсіздікке 20 жыл елді мекеніне (716 абонент) жобалаушы мекеме «Бірлестік» ЖШС-і тарапынан жобалау-сметалық құжаттамасы әзірленіп, құрылыс жұмыстарын жүргізуге бюджеттік өтінімі берілді.
Тұрғындарға газды қосу процесі белгілі бір кезеңдердің сақталуын талап ететін маңызды міндет болып табылады. Егжей-тегжейлі ақпарат алу және қосылу қызметін сұрау үшін ең алдымен жергілікті газ компаниясына хабарласу керек. Осыдан кейін қосылу учаскесіне техникалық тексеру жүргізіледі, жоба әзірленеді және газ операторымен келісіледі. Жоба мақұлданғаннан кейін мамандар газ құбырын орнатуға және газ жабдықтарын орнатуға кіріседі. Жұмыс аяқталғаннан кейін жүйе қауіпсіздікке тексеріліп, сынақтан өткізіледі. Соңғы кезең - құжаттарды дайындау және газ компаниясымен келісім жасау. Құзыретті және қауіпсіз газ қосылымы үй иелері үшін жайлылық пен қауіпсіздікті қамтамасыз етеді.

Ақпарат көзі: Шымкент қаласының Ақпараттық-коммуникациялық орталығы
Тілші: Азамат Алимбетов