ШЫМКЕНТТЕ ХАЛЫҚ ТАБЫСЫНЫҢ АРТУЫ – САЛАЛЫҚ ЕҢБЕКТІҢ ЖЕМІСІ

Мемлекет басшысы экономиканың жетістігі халықтың өмір сүру сапасына тікелей әсер етуі тиіс екенін атап өтті. Елімізде бюджеттік сала қызметкерлерінің, әлеуметтік қызметкерлердің, полиция қызметкерлерінің және басқа да мемлекеттік қызметкерлердің жалақысы кезең-кезеңімен көтерілуде.
Жергілікті деңгейде үстіміздегі жылы жалақысы 100 мың теңгеден асқан 16 мыңнан астам аз қамтылған бюджеттік қызметкерге үстемақы қарастырылған. Нәтижесінде облыс бойынша орташа жалақы 17 пайызға өсіп, 270 355 теңгені құрады (орташа жалақы 215 906 теңге, өткен жылмен салыстырғанда 23 пайызға өсті).
Шымкентте жұмыссыздық деңгейін төмендету және тұрғындардың табысын арттыру мақсатында негізгі үш бағыт бойынша салалық жұмыстар жүргізілуде. Біріншісі – жаңа жұмыс орындарын ашу, екіншісі – халықты жұмыспен қамтуға жәрдемдесу, үшіншісі – еңбек ресурстарының біліктілігін арттыру және жастарға кәсіптік бағдар беру.
Бұл шаралар өз кезегінде ең төменгі күнкөріс деңгейінен төмен табыс алатын халықтың үлес салмағын азайтуды және жұмыссыздық деңгейін төмендетуді көздейді.
Ал әлеуметтік сала қай елде де өзекті салалардың бірі. Бұл бағытта Шымкентте де ауқымды жұмыстар атқарылуда.
Биылғы жылы жұмыспен қамту шараларымен 61 мыңнан астам адам қамтылса, 36 мыңға жуық адам тұрақты жұмыспен қамтылды. Халық табысының артуына байланысты өткен жылмен салыстырғанда әлеуметтік көмек алушылардың саны 22,4 пайызға азайған. Атап айтқанда, 2022 жылы 15 600 отбасы, 2023 жылы 12 108 отбасы әлеуметтік көмек алды.
Айта кетерлігі, ел Президенті халықтың табысын арттырудың ерекше маңыздылығына тоқталып, үкіметке бұл мәселені ерекше бақылауда ұстауды тапсырған болатын.
Шымкентте де азаматтарды баспанамен қамтамасыз ету мәселесі шешілуде, өйткені қала халқының өсуіне байланысты баспанаға деген қажеттілік те артып келеді.
Қазіргі таңда қалада тұрғын үйге сұраныс күн санап артып келеді. Бүгінде қалада 51 мыңнан астам адам әлеуметтік баспана кезегінде, 175 мыңға жуық азамат несиелік баспана кезегінде тұр.
Бұл мәселені шешу үшін қалада 4 мың пәтерлік 100 әлеуметтік тұрғын үй салынуда.
1000-нан астам пәтер жұмыс істейтін жастар мен халықтың әлеуметтік осал топтарына беріледі. Шымкент қаласының 201 тұрғынына 1 миллион теңгенің тұрғын үй сертификаты тегін берілді.
Сондай-ақ, облыстық «Қамқор» тұрғын үй бағдарламасы аясында 150 отбасы жеңілдетілген несие алады.
Жалпы, жыл соңына дейін 1075 мың шаршы метр тұрғын үй пайдалануға беріледі.