Түркістан облысы. Жемқорлықты жою: Стратегиялық жоба

Жемқорлық – қоғамның дамуына кедергі келтіретін, экономикалық тұрақтылықты бұзатын, әлеуметтік әділетсіздікті тудыратын маңызды проблема. Бұл мәселе тек жеке секторда ғана емес, мемлекеттік органдарда да орын алып, мемлекет пен азаматтар арасындағы сенімді төмендетеді. Сондықтан жемқорлықты жоюға бағытталған кешенді стратегияларды іске асыру қажет.

Жобаның басты мақсаты – жемқорлық деңгейін төмендету, қоғамда адалдық пен ашықтықты нығайту, азаматтардың құқықтарын қорғау. Сыбайлас жемқорлық әлеуметтік-экономикалық даму, нарықтық экономиканы құру және инвестиция тарту процесін баяулататын, елдің даму болашағына айтарлықтай қауіп төндіретін құбылыс. Елбасы Қазақстан халқына Жолдауында «демократиялық қоғам жағдайында қылмыс пен сыбайлас жемқорлыққа қарсы күрес ерекше мәнге ие болады» деп атап көрсетті. Бұл мемлекеттің осы жағымсыз құбылысты жою бағытындағы кешенді және жүйелі күрес жүргізу саясаты жалғаса беретіндігін көрсетеді.

Сонымен қатар, сыбайлас жемқорлықпен пәрменді күресу үшін халықтың құқықтық сауаттылығын арттыру жұмыстары маңызды. Халық өздерінің құқықтарын, өздеріне қарсы қандай да бір құқыққа қайшы іс-әрекет жасалғанда қолданатын іс-қимылын білуі қажет. Конституциялық тәртіпті қорғау және бірыңғай жалпы мемлекеттік саясат жүргізу, барлық салаларда жемқорлық көріністерін төмендету – бүгінгі күннің басты мақсаты.

Жемқорлыққа қарсы шаралар:

• Жемқорлыққа қарсы заңдарды күшейту;
• Мемлекеттік қызметкерлердің этикалық кодексін енгізу;
• Мемлекеттік сатып алулардың ашықтығын қамтамасыз ету;
• Бюджет қаражатының жұмсалуын бақылау механизмдерін енгізу;
• Электрондық үкімет жүйесін дамыту арқылы мемлекеттік қызметтердің қолжетімділігін арттыру.

Қоғамды ақпараттандыру және қатыстыру:
Қоғамдық кеңестерді нығайту, олардың жемқорлыққа қарсы мониторинг жүргізу мүмкіндіктерін арттыру. Сонымен қатар, халықты жемқорлыққа қарсы ақпараттандыру және білім беру бағдарламаларын ұйымдастыру қажет. Жемқорлыққа қарсы мәдениетті қалыптастыру үшін мектептер мен жоғары оқу орындарында арнайы курстар өткізілуі тиіс. Халықаралық ұйымдармен тәжірибе алмасу да маңызды шара болып табылады.

Қорытынды:
Жемқорлықты жою – мемлекеттің әлеуметтік және экономикалық дамуы үшін аса маңызды міндет. Барлық тараптардың бірлескен жұмысы арқылы жемқорлыққа қарсы тиімді стратегияларды іске асырып, ашық, адал қоғам қалыптастыруға болады. Бұл қоғамдағы сенімді арттырып, еліміздің тұрақтылығын қамтамасыз етеді.

Тілші: Журсынбай Аружан Сабырқызы