3) Түркістан облысы жаңа тағайындалған әкімінің алдында қандай міндеттер тұр

Түркістан облысы жаңа тағайындалған әкімінің алдында қандай міндеттер тұр

  Түркістан облысы мәслихатының жиналысына Премьер-министр Олжас Бектенов пен Президент Әкімшілігінің басшысы Айбек Дәдебай қатысты. Жиналыста Мемлекет басшысының Түркістан облысы әкімі лауазымына екі кандидат ұсыну туралы хаты оқылды. Сайлау комиссиясы ашық дауыс беру арқылы Түркістан облысы әкімінің орынбасары Нұралхан Көшеров пен Созақ ауданының әкімі Мұхит Тұрысбековтің кандидатураларын қарады. Нәтижесінде, 288 дауыстың 224-і Нұралхан Көшеровке берілді, ол Түркістан облысының әкімі болып тағайындалды.

  Облыс активімен кездесуде Премьер-министр Олжас Бектенов Дархан Сатыбалдыға өңірдің дамуына қосқан үлесі үшін алғыс айтып, жаңа әкімге табыс тіледі. Ол өңір активіне жаңа әкімді таныстырып, Мемлекет басшысының облыс басшылығы алдына қойған негізгі міндеттеріне тоқталды. Олардың қатарында экономиканы әртараптандыру, жаңа жұмыс орындарын құру, өңірдің инвестициялық тартымдылығын арттыру, көлік-логистика әлеуетін дамыту және агроөнеркәсіп кешенін қолдау мәселелері атап өтілді.

 Сондай-ақ, халықтың тұрмыс сапасын жақсарту, ауыз су мен азық-түлік өнімдерінің тұрақты бағасын қамтамасыз ету, инженерлік инфрақұрылымды жаңғырту сияқты міндеттер қойылды. Түркістанның тарихи және рухани маңыздылығын ескере отырып, мәдени мұраны сақтау және туризм саласын дамытуға ерекше көңіл бөлу тапсырылды. 
Тілші: Кенжебаева Гаухар