5) Түркістан облысындағы жаңа оңалту орталығы жұмысын бастады

Түркістан облысындағы жаңа оңалту орталығы жұмысын бастады

  Сауран ауданындағы жаңа оңалту орталығы мүгедек жандарға қызмет көрсету жұмыстарын бастап, алғашқы 90 адамды қабылдады. Бұл орталық 200 орынға арналған және мүгедектігі бар адамдарға 25 күн бойы медициналық көмекпен қатар, 7 түрлі әлеуметтік қызмет көрсетеді. Орталықта пациенттерге арнаулы әлеуметтік-педагогикалық, психологиялық, еңбек, мәдени, әлеуметтік-тұрмыстық, шаруашылық бағыттағы қолдау шаралары ұйымдастырылады.

  Орталықтың заманауи құралдармен жабдықталғаны және салауатты өмір салтын ұстануға арналған арнайы спорт зал мен қысқы ботаника бағының болуы оның ерекшеліктері қатарында. Мұнда қабылданған қызмет алушыларға тек физикалық ем ғана емес, сонымен қатар эмоционалдық және әлеуметтік қолдау көрсетіледі.

  Орталықтың қызметінен Ордабасы ауданының тұрғыны, инсульттан кейін бір қолы мен аяғы сал болып қалған Елтай Лесбек өте риза. Ол бұрын Шымкенттегі оңалту орталығында болғанымен, Түркістанға келгенде қызмет көрсету деңгейі мен қолайлы жағдайды ерекше бағалағанын атап өтті.

 Орталықта қазіргі таңда 100-ден астам қызметкер жұмыс істейді, ал орталықтың жалпы сыйымдылығы 200 орынға дейін жетеді. Түркістан облысында 100 мыңға жуық мүмкіндігі шектеулі жан тұрады, олардың 40 мыңнан астамы әлеуметтік оңалту қызметіне мұқтаж. 
Тілші: Кенжебаева Гаухар Жақыпқызы