2) ШЫМКЕНТ: «БАСТАУ БИЗНЕС» жобасы айтарлықтай нәтижелерге қол жеткізді

ШЫМКЕНТ: «БАСТАУ БИЗНЕС» жобасы айтарлықтай нәтижелерге қол жеткізді

  Шымкент қаласында 2024 жылға арналған бірнеше ауқымды жоба мен бағдарламалар өз нәтижелерін көрсетіп, азаматтардың тұрмыс сапасын жақсартуға бағытталған шаралар орындалды. Әсіресе, кәсіпкерлікті дамытуға бағытталған «Бастау Бизнес» жобасы айтарлықтай табыстарға қол жеткізді. Бұл жоба аясында жеке ісін ашуға ниетті 3 383 адам тіркелген, олардың 2 612-сі оқу процесін аяқтап, 1 032 адам өз кәсібін ашты. Жоба бойынша жоспардың 50,2%-ы орындалып, шағын және орта бизнесті дамытуға елеулі үлес қосылды.

  Сондай-ақ, жұмыссыздықты төмендету мақсатында 2024 жылдың соңына дейін субсидияланатын жұмыс орындарына 7 166 азамат жолданған, олардың 5 377-сі жұмысқа орналасты, оның ішінде 3 500-і тұрақты жұмыс орындарына ие болды. Бұл көрсеткіштің 65,1%-ы құрайды. Жеке сектордың үлесі өте жоғары болып, 7 646 жұмыс берушінің 7 344-і жеке кәсіпорындардан құралып, жалпы жұмыс орындарының 96%-ы жеке секторға тиесілі болды.

  Қысқа мерзімді кәсіптік оқыту бағдарламасы да жұмысқа орналасу деңгейін арттыруда маңызды рөл атқарды. 2024 жылы 1 110 адамды оқыту жоспарланып, оның 670-і кәсіби оқуға жолданды, соның 75,6%-ы тұрақты жұмысқа орналасты.

  Осылайша, Шымкентте бизнес бастау мен жұмысқа орналастыру саласындағы нәтижелер қаланың экономикалық дамуына ықпал етуде, ал тұрғындардың әлеуметтік жағдайын жақсартуға бағытталған шаралар тиімді жүзеге асырылып келеді. 
Тілші: Кенжебаева Гаухар Жақыпқызы