Түркістанның туристік әлеуеті артуда

Түркістанның туристік әлеуеті артуда

Түркістан қаласы – Қазақстанның ғана емес, күллі түркі әлемінің рухани және мәдени орталығы. Соңғы жылдары қала жаңа даму кезеңіне аяқ басып, туристік инфрақұрылым мен қызмет көрсету сапасын жақсартуға бағытталған ауқымды жобаларды жүзеге асырып келеді. 2024 жылы Түркістан қаласына 2 миллионға дейін турист тарту жоспарлануда. Бұл қаладағы туризм саласының қарқынды дамып жатқанын айғақтайды.

Туристерді тартуға бағытталған қадамдар

Түркістанның туристік әлеуетін арттыру үшін бірқатар нақты шаралар қолға алынған. Қаланың басты туристік нысаны саналатын Қожа Ахмет Ясауи кесенесі мен оның айналасындағы тарихи орындар заманауи талаптарға сай жаңғыртылып, келушілер үшін қолайлы жағдай жасалуда. Сонымен қатар, кесене маңындағы жаяу жүргіншілер аймағы абаттандырылып, көгалдандыру жұмыстары жүргізілуде.

Туристерді қызықтыратын тағы бір маңызды бағыт – жаңа мәдени және ойын-сауық орындарының ашылуы. Халықаралық деңгейдегі мәдени шаралар ұйымдастыру да шетелдік және отандық туристердің қызығушылығын арттыруға көмектеседі.

Инфрақұрылымның жаңаруы

Түркістан қаласында туристер үшін қажетті инфрақұрылымға ерекше көңіл бөлінуде. Қалаға халықаралық әуежайдың ашылуы – туристер ағынын ұлғайтуға септігін тигізген маңызды қадамдардың бірі. Сонымен қатар, заманауи қонақ үйлер, мейрамханалар, демалыс орындары мен тарихи-мәдени нысандардың көбеюі туристік қызмет көрсету сапасын жаңа деңгейге көтеруде.

2024 жылы қаланың әртүрлі аудандарында жаңа қонақүйлер мен ойын-сауық орталықтарының құрылысы жалғасып, қызмет көрсету сапасын одан әрі жақсарту жоспарланып отыр. Бұл қадам Түркістанды Қазақстанның ең тартымды туристік орталықтарының біріне айналдыруды көздейді.

Туризм саласына инвестиция

2024 жылы Түркістан қаласына 145 млрд теңге көлемінде инвестиция тарту көзделген. Бұл қаражаттың айтарлықтай бөлігі туризм саласын дамытуға бағытталмақ. Инвестиция есебінен жаңа жұмыс орындары ашылып, жергілікті халықтың табысын арттыруға ықпал етеді.

Туристік әлеуетті нығайтудың маңызы

Түркістан қаласына келетін туристер санының көбеюі өңірдің әлеуметтік-экономикалық дамуына үлкен серпін береді. Туризм саласы жаңа жұмыс орындарының ашылуына, жергілікті кәсіпкерліктің дамуына және өңір экономикасының тұрақтылығына оң әсерін тигізеді.

Қала әкімдігі мен жергілікті билік өкілдері туризмді дамыту мақсатында қолөнер шеберлерін, кәдесый өндірушілерін және туристік қызмет көрсету саласында жұмыс істейтін кәсіпкерлерді қолдауға баса назар аударуда.

Түркістанның туристік әлеуетін арттыру – қаланың дамуындағы басты басымдықтардың бірі. Қалаға келушілер санының артуы оның беделін халықаралық деңгейде нығайтып, Түркістанды рухани әрі мәдени орталық ретінде танымал ете түседі. Қазіргі қолға алынған жобалар мен инвестициялар арқылы Түркістан алдағы уақытта тек Қазақстанның ғана емес, бүкіл Орталық Азияның басты туристік орталықтарының біріне айналары сөзсіз. 
Тілші: Түймебай Аяжан Лениншілқызы