2024 ЖЫЛДЫН 1 ҚАҢТАРЫНАН БАСТАП ЖАЛПЫҒА БІРДЕЙ ДЕКЛАРАЦИЯЛАУДЫҢ 3-КЕЗЕҢІ БАСТАЛАДЫ

«Жалпыға бірдей декларациялауға көшудің мақсаты көлеңкелі экономикамен және сыбайлас жемқорлық көріністерімен күресу үшін жеке тұлғалардың табыстары мен мүлкін тиімді бақылау жүйесін құру, сондай-ақ салықтар мен бюджетке төленетін басқа да міндетті төлемдерді жинауды қамтамасыз етудегі мемлекеттің рөлін күшейту болып табылады»,- деді, Шымкент қаласы әкімдігінің Ақпараттық-коммуникациялық орталығында өткен баспасөз конференциясында сөз алған өңірлік мемлекеттік кірістер департаментінің басқарма басшысы Б.Панбаев.
2024 жылдың 1 қаңтарынан бастап жалпыға бірдей декларациялаудың 3-кезеңі басталады.
3 - кезең шеңберінде № 250.00 формасы бойынша, яғни «Активтер мен міндеттемелер туралы» декларацияны 2024 жылдың 1 қаңтар жағдайына бизнес өкілдері, яғни дара кәсіпкерлер мен олардың жұбайлары, сондай-ақ заңды тұлғалардың басшылары мен құрылтайшылары және олардың жұбайлары декларация ұсынатын болады.
Қазіргі таңда  Шымкент қаласы бойынша 114 707 жеке кәсіпкер мен 29 262 заңды тұлға тіркелген.
Бұл міндеттеме, «Әрекетсіз» мәртебесі бар жеке кәсіпкерлерге және Шымкент қаласындағы осыған ұқсас мәртебесі бар заңды тұлға басшыларына да қатысты болады, ондай тұлғалардың саны 10 715 құрайды. Оның ішінде, 3 923 жеке кәсіпкер болса, 6 792 заңды тұлға.
Айта кету керек, егер жоғарыдағы көрсетілген тұлғалар, қазіргі таңда кәсіпкерлік қызметті жүзеге асырмаса немесе тоқтатса, декларация тапсыру міндеттемесі туындамас үшін заңды тұлғаның немесе жеке кәсіпкердің орналасқан жері бойынша мемлекеттік кірістер органына қызметін тоқтату туралы салық өтінішін беру қажет.
Сонымен қатар, өз қызметін тоқтатқан немесе сенімсіз салық төлеушілер тізімінде тұрған жеке кәсіпкер немесе заңды тұлға басшысы туралы мәліметтерді Мемлекеттік кірістер комитетінің kgd.gov.kz сайтынан көруге болады.
«Дөңгелек үстел» отырысының  толық нұсқасын https://www.youtube.com/@AKO17/streams    сілтемесіне өту арқылы көре аласыздар.

Ақпарат көзі: Шымкент қаласы әкімдігінің Ақпараттық-коммуникациялық орталығы
Тілші: Азамат Алимбетов