Шымкент қаласының экономикалық дамуы соңғы жылдары айтарлықтай серпін алды.

Шымкент қаласының экономикалық дамуы соңғы жылдары айтарлықтай серпін алды. Қалада экономиканың түрлі салалары бойынша ауқымды жобалар жүзеге асырылып, бизнес үшін қолайлы орта қалыптасуда. Қала басшылығының стратегиялық бағыттары мен жүргізілген реформалар нәтижесінде Шымкенттің экономикасы тұрақты түрде өсіп, азаматтардың тұрмыс деңгейі артуда. Үкіметтің жоспарына сәйкес, 2028 жылға дейін қалаға 5,6 триллион теңге инвестиция тарту көзделуде. Бұл ауқымды жобалар қаланың экономикасын жаңа деңгейге көтеруге мүмкіндік береді. Қала кәсіпкерлеріне мемлекеттік қолдау шаралары аясында 23,5 миллиард теңге бөлініп, бизнесті дамытуға арналған жаңа жобалар іске қосылуда. 

     Шымкент қаласының әкімі Ғабит Сыздықбеков Орталық коммуникациялар қызметі алаңында өткен көшпелі есеп беру кездесуінде экономикалық көрсеткіштердің халықтың өмір сүру сапасына тікелей әсер ететінін атап өтті. Шымкент қаласы төмен жалақы деңгейімен белгілі өңірлер қатарына кіреді. Алайда, жалақыны арттыруға бағытталған жүйелі шаралар қабылданып жатыр. «Біз төмен жалақы алатын 15 мыңға жуық азаматтық қызметкердің жалақысын 50 мың теңгеге арттырдық. Бұл мақсатқа жергілікті бюджеттен 10 миллиард теңге бөлінді. Нәтижесінде, жергілікті бюджет есебінен қаржыландырылатын мекемелерде ең төменгі жалақы 140 мың теңгеден асты. Қазіргі уақытта қаланың орташа жалақы мөлшері 12,5%-ға өсіп, 304 мың теңгені құрады», – деді Ғ. Сыздықбеков. 
     Мегаполис басшысы жұмыс орындарын құру және халықтың табысын тұрақтандыру бағытында жүйелі жұмыс жүргізіліп жатқанын жеткізді. Қалада белсенді жұмыс істейтін азаматтар саны 468 мыңнан асты. Жұмыссыздық деңгейін төмендету мақсатында биыл 45 мыңнан астам адамды жұмыспен қамту шараларымен қамту жоспарланған, оның ішінде 32 мың адам тұрақты жұмысқа орналастырылды. Жұмыспен қамту және мемлекеттік қолдау шараларының нәтижесінде атаулы әлеуметтік көмек алушылардың саны 30%-ға қысқарды, ал өткен жылмен салыстырғанда жұмыссыздық деңгейі 4,8%-ға дейін төмендеді.
     2024 жылдың қаңтар-қыркүйек айларында Шымкент қаласының Сауда және тұтынушылардың құқықтарын қорғау департаменті тұтынушылардың құқығын қорғау мақсатында көптеген талап-арыздар бойынша сот отырыстарына қатысты. Нәтижесінде бірнеше жағдай бойынша тұтынушылардың құқықтары қалпына келтіріліп, сот оң шешім шығарды, ал жалпы сомасы 2 774 750 теңге тұтынушыларға қайтарылды. Шымкент қаласы бойынша Сауда және тұтынушылардың құқықтарын қорғау департаменті 2024 жылдың 9 айында айтарлықтай жұмыс атқарды. Осы кезеңде департамент 3908 өтінішті қарады, оның ішінде 3274 өтініш қанағаттандырылып, жалпы сомасы 198,5 млн теңге тұтынушыларға қайтарылған. Сонымен қатар, 381 өтінішке қатысты тұтынушыларға түсіндірмелер беріліп, 116 өтініш басқа органдарға бағытталды. 41 өтініш иелері тарапынан кері қайтарылса, 18 талап-арыз бойынша сотқа жүгінілді, оның 9-ы бойынша оң шешім қабылданып, 3 млн теңгеден астам қаражат өндірілген. Сондай-ақ, департамент "Тұтынушылардың құқықтарын қорғау туралы" заңның негізінде 10-нан астам азаматтың құқықтары бұзылған екі жағдайды анықтап, олардың құқығын қорғау үшін сотқа жүгінді. Нәтижесінде 280 мың теңге тұтынушыларға қайтарылды. 
  Сот шешімімен қанағаттандырылған негізгі істер: 
1. «Орынбасар-Сұлтан» ЖШС қызметі бойынша – департамент сотқа тұтынушылар тобының атынан талап-арыз беріп, 115 000 теңге сомасында өтемақы қайтарылды. 
2. «SC CRAND» ЖШС қызметі бойынша – тұтынушылар тобының арызы бойынша сот шешімімен 165 000 теңге қайтарылды. 
3. ЖК «Samurug Grup» және С.К. Алтынбекова арасындағы іс – сапасыз аяқ массажы құрылғысы үшін 343 000 теңге қайтарылды. 
4. «Компания Эврика» ЖШС және В.В. Марков арасындағы іс – жарамсыз теледидар үшін 375 000 теңге өтемақы төленді. 
5. «Белый Ветер» ЖШС-мен болған дау – сапасыз компьютер үшін 506 750 теңге, моральдық залал үшін 50 000 теңге, және өкілдік шығындар үшін 150 000 теңге қайтарылды және т.б. 
     Бұл істерде Шымкент қаласының Сауда және тұтынушылар құқықтарын қорғау департаменті белсенді түрде тұтынушылар құқығын қорғап, тұтынушылардың материалдық шығындарын қайтаруға елеулі үлес қосты.
     Қорытындылай келе, Шымкент қаласының әкімі Ғабит Сыздықбеков қаладағы экономикалық жағдай мен халықтың әл-ауқатын жақсарту бағытында жүйелі шаралар қабылданып жатқанын атап өтті. Жалақы деңгейін арттыру, жұмыссыздықты төмендету, және азаматтарды жұмыспен қамту мәселелері басты назарда. 
    Сонымен қатар, Шымкент қаласының Сауда және тұтынушылардың құқықтарын қорғау департаменті тұтынушылардың құқығын қорғау бойынша айтарлықтай жұмыстар атқарды, нәтижесінде сот шешімдері бойынша тұтынушылардың материалдық шығындары қайтарылды. Бұл шаралар қала тұрғындарының өмір сүру сапасын арттыруға бағытталған маңызды қадамдар болып табылады.

Тілші: Кенжебаева Гаухар Жақыпқызы