4) Шымкентте Халықаралық театр фестивалі ашылды

Шымкентте Халықаралық театр фестивалі ашылды

  Шымкентте Ж.Шанин атындағы академиялық қазақ драма театрының 95 жылдығына орай Орталық Азия елдері театрларының IX Халықаралық театр фестивалі басталды. Бұл өнер мерекесіне елімізден бөлек, Қырғызстан, Өзбекстан, Түркия, Қарақалпақстан, Татарстан және Әзірбайжанның театр ұжымдары қатысуда.

  Фестивальдің ашылуы салтанатты түрде өтті, оның алдында еліміздің танымал тұлғалары мен халықаралық сарапшылар журналистерге сұхбат берді. Ал ашылу шарасы Ж.Шанин театрының 95 жылдығына арналған бейнефильммен басталды. Шымкент қаласының әкімі Ғабит Әбдімәжитұлы өз сөзінде театрдың қоғамдағы маңызды орнын атап, Мемлекет басшысының мәдениет пен өнердің ұлттың жаны мен рухани келбеті екенін айтқан сөздерін еске алды. Ол Шанин театрының 95 жылдық тарихында қазақ өнеріне қосқан үлесін жоғары бағалап, театрдың қаланың рухани ордасына айналғанын айтты.

  Ж.Шанин театры классикалық және заманауи қазақ драматургиясының үздік үлгілерін сахналап, ұлттық құндылықтарды дәріптеп келеді. Театрда көптеген танымал режиссерлер мен актерлердің есімдері жарқырап, жаңа таланттар ашылды. Биыл театр труппасы 18 жас актермен толықты. Бұл жылдар ішінде театр сахнасында жүздеген спектакльдер қойылып, көптеген көрнекті тұлғалар өз мансабын осы жерде бастады.

  Фестиваль аясында 10 театр өз өнерлерін көрсетіп, «Шеберлік сабақтары» өткізіліп, театр мамандарының шығармашылық әлеуеті мен кәсіби деңгейін көтеру мақсатында жұмыстар жүргізіледі. Бұл шара өңірдегі мәдениет саласын дамытуға, өнер ұжымдары арасындағы тәжірибе алмасуға үлкен септігін тигізуде. 
Тілші: Кенжебаева Гаухар Жақыпқызы