Шымкентте екі жас адам «Алаш» базары маңынан жоғалды

Шымкентте екі жас адам «Алаш» базары маңынан жоғалды

Шымкент қаласында екі жас адамның «Алаш» базары маңынан із-түссіз жоғалып кетуі қоғамда үрей тудырып отыр. Әлеуметтік желілерде тараған ақпаратқа сәйкес, бірінші оқиғада 17 жастағы Ермекбай Арайлым Ерболқызы түнгі сағат 23:00 шамасында Шымкенттен Шұбарсу ауылына таксимен қайтуға аттанған. Ол таксиге «Алаш» базарының алдынан отырғаннан кейін телефоны өшіп, хабарсыз кеткен.

Шымкент қаласы полиция департаменті жоғалған қызды іздеу жұмыстарын жүргізіп жатыр. Департаменттің баспасөз қызметінің хабарлауынша, іздеу жұмыстарына Шымкент қаласы полиция департаментінің кешенді күштері мен құралдары жұмылдырылған, аудандық бөлімдер мен көрші өңірлердің полиция департаменттеріне де хабарланған.

Бірнеше күннен кейін ұқсас оқиға қайталанды. Бұл жолы 20 жастағы Еділбек Бәйдібек Ақмырзаұлы Ордабасы ауданынан Шымкентке келіп, көлік жүргізу куәлігін алу үшін жүрген. Шаруасын бітіргеннен кейін «Алаш» базары аумағынан таксиге отырған жігіт үйіне жетпеген. Оның телефоны да сөндірілген.

Шымкент қаласы полиция департаментінің баспасөз қызметі Еділбек Бәйдібек Ақмырзаұлын іздеу жұмыстарының жүргізіліп жатқанын растады. Департаменттің барлық күші жоғалған азаматты табуға жұмылдырылған.

Екі жас адамның да «Алаш» базары маңынан жоғалып кетуі қоғамда үлкен алаңдаушылық тудырып, қаладағы қауіпсіздік мәселелерін қайтадан талқылауға себеп болуда. Полиция департаментінің тез арада жоғалған адамдарды табуы және оқиғаның нақты себептерін анықтауы өте маңызды. Осы оқиғалар қала тұрғындарының сақтық шараларын күшейтуіне және жағдайға байланысты тиісті органдарға хабарлауына шақырады. 
Тілші: Жүрсінбай Аружан Сабырқызы