ТҮРКІСТАН ОБЛЫСЫНЫҢ МЕДИЦИНА ҚЫЗМЕТКЕРЛЕРІНЕ ҚҰРМЕТ КӨРСЕТІЛДІ

Түркістан облысында медицина қызметкерлері күніне арналған салтанатты іс-шара биылғы жылы ерекше мәнге ие болды. Облыстың түрлі аудан-қалаларынан келген денсаулық сақтау ардагерлері, үздік дәрігерлер мен медбикелер, медицина ұйымдарының өкілдері бұл басқосуда бір-біріне қолдау білдіріп, ортақ жетістіктерін атап өтті.

Облыс әкімінің орынбасары Бейсенбай Тәжібаев медицина қызметкерлерін кәсіби мерекелерімен құттықтап, олардың елдің дамуына қосып жатқан зор үлесін жоғары бағалады. Өз сөзінде ол мемлекет тарапынан медицина саласына ерекше көңіл бөлініп отырғанын, әсіресе ауылдық жерлерде сапалы медициналық қызметтің қолжетімді болуын қамтамасыз ету бағытында ауқымды жұмыстар жүргізіліп жатқанын атап өтті. Саланың үздік мамандары «Еңбек ардагері», «Денсаулық сақтау ісінің үздігі», «Денсаулық сақтау ісіне қосқан үлесі үшін» төсбелгілерімен, сондай-ақ Құрмет грамоталары және алғыс хаттармен марапатталды. Бұл марапаттар сала мамандарына деген шынайы құрмет пен ризашылықтың белгісі болды.

Соңғы жылдары Түркістан облысында медицина саласы ерекше қарқынмен дамып келеді. 2024 жылы ауылдық жерлерде медициналық көмектің сапасын арттыру мақсатында 55 жаңа медициналық нысан пайдалануға берілді. Оның ішінде 49 мекеме «Ауылдық денсаулық сақтау» ұлттық жобасы аясында салынса, 2 нысан дайын ғимараттарды сатып алу арқылы іске қосылды. 1 нысан жеке инвестиция есебінен салынса, 3 нысан жергілікті бюджеттен қаржыландырылды. Бұл — шалғай ауыл тұрғындары үшін қолжетімді және сапалы медициналық көмекке бір табан жақындай түскенін білдіреді.

Сонымен қатар, аймақтағы 4 аудандық аурухана күрделі жөндеуден өткізілді. Қазіргі таңда тағы 4 аурухананың күрделі жөндеу жұмыстары басталды. Тағы 2 нысанның құрылысы 2026 жылға өтпелі жоба ретінде жоспарланған. Бұл өзгерістер медициналық мекемелердің материалдық-техникалық базасын нығайтып, тұрғындарға көрсетілетін медициналық қызмет сапасын жаңа деңгейге көтеруге жол ашуда.

Медицина саласындағы кадр мәселесін шешу де басты назарда. 2024 жылы Түркістан облысынан 20 дәрігер Ресейдің Санкт-Петербург қаласында біліктілігін арттырды. Сонымен қатар, халықаралық деңгейде тағы 75 медицина қызметкері шетелдік мамандардың қатысуымен оқудан өтті. Жыл соңына дейін 200 жалпы тәжірибелік дәрігер мен 190 орта буын медицина қызметкерлерін қайта даярлау жоспарланып отыр. Бұл шаралар өңірдегі медицина сапасын арттыруда шешуші рөл атқарады.

Бұрынғы жылдармен салыстырғанда 2024 жылғы жетістіктер анағұрлым ауқымды. Мәселен, 2022–2023 жылдары медициналық инфрақұрылым негізінен қала орталықтарында дамыса, ауылдық аймақтарда өзгерістер баяу жүрді. Ал биыл ауылдық елді мекендерде 55 жаңа нысанның ашылуы – мемлекет саясатының шынайы нәтиже бергенінің дәлелі. Бұған дейін дәрігерлік амбулаториялар мен медпункттер мәдениет үйлері мен ескі ғимараттарда орналасып, медициналық қызмет көрсету қиындай түссе, енді заман талабына сай жаңа нысандарда сапалы көмек алу мүмкіндігі кеңейді.

Тағы бір маңызды мәселе – кадр тапшылығы. Түркістан облысында бүгінде 400-ден астам бейінді маман жетіспейді. Бұл проблема жаңа нысандардың ашылуына байланысты күшейіп отыр. Осыған орай мемлекет 5 жылдық кадр даярлау жоспары аясында өңірге 639 резидентура грантын бөлді. Оның ішінде 176 грант 2024 жылы игеріліп, болашақ дәрігерлер даярлық кезеңіне кірісті.

Медицина қызметкерлеріне арналған салтанатты іс-шара олардың еңбегін тек кәсіби деңгейде ғана емес, адамгершілік тұрғыдан да жоғары бағалаудың көрінісі болды. Бұл – ақ халатты абзал жандардың қоғам алдындағы жауапты міндетін ескеріп, оларға көрсетілген лайықты құрмет.

Қорыта айтқанда, Түркістан облысында медицина саласы жүйелі түрде дамып келеді. Жаңа нысандардың салынуы, кадрлық әлеуеттің артуы, халықаралық әріптестік пен сапалы оқыту жүйесі – мұның бәрі облыс тұрғындарына көрсетілетін медициналық көмектің сапасы мен қолжетімділігін арттыруға бағытталған нақты істер. Өткен жылдармен салыстырғанда саладағы серпін анағұрлым жоғары, ал алдағы кезеңдерде бұл даму қарқыны жалғасын табатынына сенім мол.