Шымкент қаласының әкімі Ғабит Сыздықбеков «Ақтас» тұрғын алабындағы қаңғыбас жануарларды ұстау орнын аралап, қала көшелерінің санитарлық жағдайын текс

Шымкент қаласының әкімі Ғабит Сыздықбеков «Ақтас» тұрғын алабындағы қаңғыбас жануарларды ұстау орнын аралап, қала көшелерінің санитарлық жағдайын тексерді

Шымкент қаласының әкімі Ғабит Сыздықбеков қаланы кезекті аралау барысында «Ақтас» тұрғын алабындағы қаңғыбас жануарларды уақытша ұстау орнына барды. Жануарларға жасалған жағдаймен танысып, жауапты тұлғаларға жүйелі түрде бақылау жүргізуді тапсырды. Сонымен қатар, медициналық қызмет көрсету мен тамақтану мәселелеріне ерекше назар аудару қажет екенін ескертті. Әрі қарай қала көшелерін, қоғамдық орындарды және аулаларды жаяу аралады. Атап айтқанда, Рашидов, Володарский, Қабанбай батыр, Төле би, Адырбеков, Диваев, Қазыбек би көшелерін, Қонаев және Тәуке хан даңғылын, «Қошқар-ата» өзені жағалауын, Диваев көшесіндегі гүлзарды және «Ордабасы» алаңын тексерді.

Тексеру нәтижесінде аудан әкімдіктері мен бірқатар басқарма басшыларына көшелердің санитарлық жағдайына мониторинг жұмысын күшейтуді және істен шыққан жарықшамдарды дер кезінде ауыстыруды тапсырды. Қала басшысы барлық кемшіліктер жақын арада жойылуы тиіс екенін ескертті. «Қала тұрғындары үшін жайлы әрі қауіпсіз жағдай жасау жұмыстары жүйелі түрде жалғасуы керек және бұл ретте тұрғындардың пікірі мен ұсыныстары ескерілуі қажет», - деді қала басшысы.

Сонымен қатар, Ғабит Сыздықбеков қаладағы қоғамдық орындар мен көшелердің тазалығын сақтауды басты назарда ұстап, әрбір мәселеге дер кезінде жауап беру қажет екенін атап өтті. Әкім қала тұрғындарының өмір сүру сапасын жақсарту үшін барлық қажетті шараларды қабылдау керектігін айтты. 
Тілші: Жүрсінбай Аружан Сабырқызы