8) Түркістан театры жылдың алғашқы премьерасын сахналайды

Түркістан театры жылдың алғашқы премьерасын сахналайды

  Түркістан музыкалық драма театры жаңа маусымда өзінің алғашқы премьерасын ұсынғалы отыр. Театрдың талантты жас әртісі әрі режиссері Мұзафар Ғалымжанұлының авторлығымен сахналанатын «Жалдамалы пәтер» спектаклі көрерменге ұсынылады. Шығармашылық ұжым бұл туындыны үлкен дайындықпен жасап, сахналауға қызу дайындық жүргізуде. Мұзафар Ғалымжанұлының айтуынша, қойылымның алғашқы идеясы жертөледе пайда болған, бірақ көптің қолдауымен ол толықтырылып, жүзеге асырылған.

  Қойылымның тақырыбы қазіргі қоғам үшін өзекті. Күнделікті тіршіліктің қамытын киіп, жалдамалы пәтерде өмір сүріп жатқан адамдардың тағдыры туралы айтылады. Спектакльде бір үйде күтпеген жағдайда кездескен қыз бен жігіттің арасындағы махаббат хикаясы музыка мен комедия жанрларында өрбиді. Мұнда жанды да, жеңіл болашаққа үміт артатын сәттер, сондай-ақ өмірдің қиындықтары көрсетіледі.

  Қойылымның басты рөлдерінде театрдың талантты әртістері Қадыржан Төреханов, Аяжан Жұмабек, Досымжан Арқабеков, Аида Серикова, Темірлан Еркінғалиев, Ақ-Сұлтан Әнуарбек және басқа да әртістер өнер көрсетеді. Қойылымның композиторы Ербол Нариманұлы, ал көркемдік жетекшісі – Мадина Мұратпекова. Спектакль 18-19 қаңтар күндері көрерменге ұсынылады, сондықтан өнер сүйер қауымға бұл ерекше туындыны тамашалау мүмкіндігі туып отыр. 
Тілші: Кенжебаева Гаухар Жақыпқызы