3) Шымкент қаласында халықты жұмыспен қамтудың белсенді шараларының бірі – қысқа мерзімді кәсіптік оқу

Шымкент қаласында халықты жұмыспен қамтудың белсенді шараларының бірі – қысқа мерзімді кәсіптік оқу

  Шымкент қаласында халықты жұмыспен қамтудың белсенді шараларының бірі болып саналатын қысқа мерзімді кәсіптік оқу бағдарламасы қала тұрғындарының жұмысқа орналасу мүмкіндігін арттырып, олардың кәсіби дағдыларын дамытуға бағытталған. Бұл бағдарлама екі бағытта жүзеге асырылады: кәсіптік білім беру ұйымдарында және жұмыс берушілердің жұмыс орнында. 2024 жылы 670 тұрғын осы бағдарлама аясында кәсіптік оқуға жолданып, олардың 393-і оқуын аяқтап, сертификат алды. Олардың 297-сі тұрақты жұмысқа орналасты.

  Қысқа мерзімді оқудың барысында қала тұрғындары түрлі мамандықтарды меңгерді, олардың арасында визажист, графикалық дизайнер, кондитер, косметолог-эстетик, маникюр шебері, даяшы, шаштараз, аспаз, жиһаз жинақтаушы, сантехник, тігінші сынды 26 мамандық бар. Ал жұмыс орнында білім алғандар бухгалтер-кассир, киім мен аксессуарларды безендіруші, құрылыс жұмыстарының шебері, наубайшы және тағы басқа мамандықтар бойынша біліктіліктерін арттырды.

  Шымкенттің 53 жастағы тұрғыны Индира Қырықбаева мен 49 жастағы Асия Ауезбаева «RECOMP» оқу орталығында наубайшы мамандығы бойынша білім алып, үш айда осы саланың қыр-сырын меңгеріп, сертификат алды. Олардың екеуі де оқуын аяқтаған соң, «Turan Retail» мекемесіне тұрақты жұмысқа орналасты. Индира мен Асия осы қысқа мерзімді кәсіптік оқу арқылы жалақысы қанағаттанарлық жұмысқа орналасып, өздерінің кәсіби өмірін қайта бастады.

  Бұл бағдарламаның мақсаты — тұрғындарға жұмысқа орналасуға қажетті дағдыларды үйрету, қысқа мерзімде мамандық беру және нәтижесінде олардың еңбек нарығында бәсекеге қабілетті болуын қамтамасыз ету. Сонымен қатар, бұл шара жұмыссыздықты азайтуға және жастар мен ересектерге жаңа мүмкіндіктер ұсынуға бағытталған. 
Тілші: Кенжебаева Гаухар Жақыпқызы