Шымкентте екі тұрғын алап газбен қамтамасыз етілді

 Шымкентте екі тұрғын алап газбен қамтамасыз етілді

Шымкент қаласының әкімі Ғабит Сыздықбеков Қайтпас-1 және Тәуелсіздікке 20 жыл тұрғын алаптарының газға қосылу салтанатына қатысты. Тұрғын алаптары мен шағын аудандарды кезең-кезеңімен газдандыру аясында 1250-ден астам абонент табиғи газға қол жеткізді. Бұл 5000-нан астам тұрғынның тұрмыс жағдайын жақсартады.

Газ құбырларының құрылысы өткен жылдың көктемінде басталып, жалпы ұзындығы шамамен 40 шақырымды құрайды. Қала басшысы тұрғындардың қуанышына ортақтасып, жауапты қызметкерлерге алғысын білдірді. Сонымен қатар, тұрғындарға табиғи газды пайдалану ережелерін сақтауды және газ жабдықтарының жай-күйін үнемі тексеріп отырудың маңыздылығын ескертті.

Тұрғын алаптарын газдандыру көмірге тәуелділікті азайтып, ауаның ластану деңгейін төмендетеді және қаланың экологиялық жағдайын жақсартады. Газға қосылу үшін тұрғындар "QazaqGaz Aimaq" АҚ-на қажетті құжаттармен өтініш беруі керек. Бұл шара қала тұрғындарының өмір сүру сапасын арттыру бағытындағы маңызды қадам болып табылады. 
Тілші: Жүрсінбай Аружан Сабырқызы