Шымкентте металл өңдеу және құрылыс саласының кәсіпкерлері ірі өндірушілермен байланыс орнатуда

Шымкентте металл өңдеу және құрылыс саласының кәсіпкерлері ірі өндірушілермен байланыс орнатуда

Шымкент қаласының кәсіпкерлер палатасында металл өңдеу және құрылыс саласындағы кәсіпкерлердің қатысуымен маңызды кездесу өтті. Бұл шараға Қазақстандағы ең ірі металлургиялық зауыттардың бірі – Qarmet АҚ өкілі арнайы шақырылды. Іс-шараның негізгі мақсаты – ірі өндіріс орындары мен жергілікті бизнес-қауымдастық арасындағы серіктестік қарым-қатынасты нығайту.

Qarmet АҚ: Қазақстанның металлургия алыбы

Палата директорының орынбасары Бауыржан Бердалиевтің айтуынша, Qarmet АҚ – Теміртау қаласында орналасқан, тау-кен және болат, металлургия мен көмір саласында жетекші рөл атқаратын кәсіпорын. Компания өнімдерінің негізгі бөлігі экспортқа бағытталған. Сонымен қатар, құрылтайшының ауысуымен компанияның өндірістік саясатына да өзгерістер енгізілген.

– Біздің басты мақсатымыз – ірі компаниялар мен жергілікті кәсіпкерлер арасында тікелей байланыс орнату. Бұл екі тарапқа да тиімді болатыны сөзсіз. Qarmet АҚ өкілінің Шымкентке алғаш рет келуі – осы бағыттағы маңызды қадам, – деді Бауыржан Бердалиев.

Жаңғырту және ішкі нарықты қамтамасыз ету

Кездесу барысында Qarmet АҚ өкілі Айгүл Дауенова компанияның даму стратегиясын таныстырды.

– Біздің басты басымдықтарымыз – құрылғыларды жаңғырту, өндірістік қауіпсіздікті арттыру және өндіріс көлемін ұлғайту. Сонымен қатар, Қазақстанның ішкі нарығының тау-кен және металл өнімдеріне деген сұранысын толығымен қамтамасыз етуге тырысамыз. Қазіргі таңда Ресейде, Өзбекстанда және Әзірбайжанда ресми өкілдіктеріміз бар. Біздің мақсатымыз – Шымкенттің кәсіпкерлерімен тікелей байланыс орнатып, өнімдерімізді жеткізу мәселесін оңтайландыру, – деді Айгүл Дауенова.

Жергілікті кәсіпкерлердің қызығушылығы

Шымкенттік кәсіпкерлер, әсіресе, металл өнімдер мен темір-болат материалдарының жаңа түрлеріне ерекше қызығушылық танытты. Онлайн форматта өткен сұрақ-жауап сессиясында олар заманауи құрылыс материалдары, металл өнімдерінің сапасы және өндірістік серіктестік мүмкіндіктері туралы сұрақтарын қойып, нақты жауаптар алды.

Өңірлік серіктестік мүмкіндіктері

Бұл кездесу металлургия саласындағы ірі өндіріс орындары мен жергілікті компаниялар арасындағы серіктестіктің жаңа деңгейге көтерілетінін көрсетеді. Шымкент қаласы кәсіпкерлер палатасы алдағы уақытта да осындай ірі компаниялармен жергілікті бизнесті байланыстыру арқылы өңір экономикасын дамытуға бағытталған жұмыстарды жалғастырмақ.

Qarmet АҚ мен Шымкент кәсіпкерлерінің серіктестігі Қазақстанның ішкі нарығын нығайтып қана қоймай, өңірлік құрылыс және металл өңдеу саласының дамуына тың серпін береді деп күтілуде. 
Тілші: Жүрсінбай Аружан Сабырқызы