«Менің Елім – Менің Туым»: Түркістанда патриоттық рух жандануда
4 маусым – Қазақстан Республикасының Мемлекеттік рәміздері күніне орай ел көлемінде «Менің Елім – Менің Туым» республикалық акциясы бастау алды. Бұл бастаманың басты мақсаты – Мемлекеттік Туға деген құрметті арттыру, елдік сана мен ұлттық бірегейлікті қалыптастыру, жастардың бойындағы патриоттық рух пен азаматтық жауапкершілікті нығайту.Түркістан облысында бұл акция ауқымды түрде ұйымдастырылып, түрлі форматтағы шаралармен толықты. Облыстық жастар ресурстық орталығының үйлестіруімен қалалар мен аудандарда, ауылдық округтерде бір мезетте Ту көтеру рәсімдері өткізілді. Оған мәслихат депутаттары, қоғам қайраткерлері, еріктілер мен белсенді жастар кеңінен атсалысты. Әсіресе жастардың бұл бастамаға ерекше ықыласпен қатысуы олардың елге, мемлекеттік рәміздерге деген құрметінің арта түскенін көрсетті.
Акция шеңберінде автокеруендер, флешмобтар, спорттық сайыстар, патриоттық концерттер мен салтанатты жиындар өтті. Сонымен қатар, әлеуметтік желілерде «Менің Туым – Менің мақтанышым» тақырыбындағы бейнеүндеулер, фотосессиялар мен челлендждер белсенді түрде жарияланды. Бұл – патриоттық іс-шаралардың цифрлық кеңістіктегі көрінісі ретінде үлкен мәнге ие болды.
Биылғы акцияның ерекшелігі – жастармен жұмыс форматының жаңаруы мен патриоттық сезімді әртарапты әдістермен жеткізуі. Тек ресми шаралармен шектелмей, көшелерде, мектеп алаңдарында, спорт кешендерінде, тіпті тұрғын үйлердің маңында да Мемлекеттік Туды көтеру рәсімдері ұйымдастырылды. Бұл кеңінен таралу – акцияның халықтық сипат алғанын аңғартты.
Бұған дейінгі жылдардағы осындай акциялармен салыстырар болсақ, мысалы, 2022 жылы өткізілген шаралар көбіне мектептер мен мемлекеттік мекемелер аясында шоғырланған еді. Сол кезде жастардың қатысу деңгейі шектеулі болған. 2023 жылы бұл көрсеткіш аздап артқанымен, көбіне ресми іс-шаралар форматында шектелді. Ал 2024 жылғы акцияда өңірлер арасында бір мезгілде Ту көтеру рәсімі алғаш рет кең көлемде ұйымдастырылып, бұл патриоттық идеяны халықтың жүрегіне жақындата түсті.
Түркістан жастары биылғы жылы бұл науқанға айрықша серпін берді. Мәселен, облыс орталығында өткізілген велошеру – Тудың бейнесін көтеріп, елдік идеологияны спорт арқылы дәріптеудің жарқын үлгісі болды. Жас белсенділердің қатысуымен өткен флешмобтар мен ән-жыр кештері, тарихи-танымдық экскурсиялар жастардың ұлттық болмыс пен тарихи санаға деген қызығушылығын арттырды.
Тағы бір ерекше тұсы – мемлекеттік рәміздерге арналған танымдық ашық сабақтар мен интерактивті викториналар мектеп оқушылары мен колледж студенттерінің қатысуымен ұйымдастырылды. Бұл жас ұрпақтың елдік символдар тарихын терең тануына сеп болды.
Аталған бастама жастармен қатар барлық буын өкілдерінің де қолдауына ие болды. Қала көшелерінде, қоғамдық көліктерде, тіпті жекеменшік кәсіпорындар мен дүкендерде Мемлекеттік Ту ілінген көріністер жиілей түсті. Бұл – халықтың рухани оянуында, мемлекетке деген сенім мен сыйластықты бейнелеуде маңызды көрсеткіш.
Патриоттық тәрбие – ұлт болашағының кепілі. Осы бағытта жүргізілген осындай кең көлемдегі науқан арқылы жастардың сана-сезіміне әсер ету, олардың елге, жерге деген сүйіспеншілігін арттыру – аса маңызды міндеттердің бірі. Түркістан өңіріндегі «Менің Елім – Менің Туым» акциясы осы міндетті абыроймен атқарып, жастардың жүрегіне елдік сана ұрығын еккен бірегей шара болды.
Жалпы алғанда, бұл патриоттық акция Түркістан өңірінде жыл сайын ұйымдастырылып келеді. Дегенмен, биылғы жылғы іс-шара өзінің мазмұны, форматы және ауқымы жағынан бұрынғылардан едәуір өзгеше. Әсіресе жастармен жұмыстың кеңеюі, цифрлық платформалардағы белсенділік пен қоғамдық қолдаудың артуы акцияның сәтті жүзеге асқанын дәлелдейді.
Ендігі кезекте осындай ауқымды бастамалар жыл бойы жалғасып, жастармен тұрақты жұмыс жүйесіне айналуы тиіс. Туды құрметтеу – тек бір күндік науқан емес, бұл – азаматтық парыз, ұлттық рухтың айғағы. «Менің Елім – Менің Туым» деген ұранмен өткен бұл акция – елдің бүгіні мен болашағын байланыстыратын маңызды көпірдің бірі.
Тілші Тогжан Габидинова
Обсудить
Другие статьи:
БАСПАСӨЗ – ХАБАРЛАМА
04 Желтоқсан 2025, Бейсенбі
ПРЕСС-РЕЛИЗ
04 Желтоқсан 2025, Бейсенбі
Шымкентте студенттер экологиялық бастамаларды талқылады
03 Желтоқсан 2025, Сәрсенбі
Похожие материалы:
Комментарии (0)