Шымкент қаласы Әл-Фараби аудандық полиция қызметкерлерінің Политехникалық колледж студенттерімен кездесуі

2025 жылғы 30 қыркүйекте Шымкент қаласы Полиция департаментінің Әл-Фараби аудандық полиция басқармасы қызметкерлері Политехникалық колледж студенттерімен тәрбиелік бағыттағы маңызды кездесу өткізді. Бұл іс-шараның негізгі мақсаты – жастар арасында құқық бұзушылықтың алдын алу, тәртіпті сақтауға баулу, жаман әдеттерден аулақ болуға үндеу және салауатты өмір салтын дәріптеу.
Кездесуге Жергілікті полиция қызметі басқармасының ювеналдық полиция тобының жауапты қызметкерлері қатысты. Олар жастармен ашық сұхбат жүргізіп, өмірлік тәжірибелерімен бөлісіп, құқықтық мәдениетті қалыптастыруға бағытталған ойларымен бөлісті.
Колледждің мәжіліс залында өткен жиынға студенттер, оқытушылар мен колледж әкімшілігі де атсалысты. Әрбір студентке қоғамда өз орнын табу, дұрыс бағытты таңдау және құқықтық сауатты болудың маңыздылығы түсіндірілді.
Полицейлер сөз барысында жастарға жаман әдеттердің, әсіресе шылым шегу, ішімдік ішу, есірткі қолдану сынды зиянды әрекеттердің салдары туралы кеңінен әңгімеледі. Олар мұндай әрекеттердің тек денсаулыққа ғана емес, адамның болашағына да ауыр соққы әкелетінін нақты мысалдармен түсіндірді.
«Әрбір жас өзінің болашағы үшін жауапты. Бүгінгі таңда қабылданған шешімдер ертеңгі тағдырды айқындайды. Егер жастар теріс әдеттерге бой алдырмай, уақытын тиімді пайдаланып, білімге ұмтылса – болашағы жарқын болмақ», – деді полиция капитаны.
Кездесуде салауатты өмір салтының артықшылықтарына да ерекше тоқталды. Спортпен шұғылдану, дұрыс тамақтану, бос уақытты пайдалы өткізу – адамның жан-жақты дамуына ықпал ететіні айтылды.
Полицейлер студенттерге:

• күнделікті режимді дұрыс жоспарлау;
• спортпен тұрақты айналысу;
• зиянды әдеттерден бойды аулақ ұстау;
• шығармашылықпен шұғылдану, кітап оқу, жаңа дағдыларды үйрену қажеттігін атап өтті.

Бұл кеңестер жас буынның тек білімді ғана емес, сонымен қатар дені сау, белсенді, қоғамға пайдалы азамат болып өсуіне бағытталды.
Жиын барысында қылмыстық және әкімшілік жауапкершілік жасы туралы да маңызды ақпарат берілді. Полицейлер әрбір құқық бұзушылықтың өз салдары болатынын, тіпті болмашы көрінген әрекеттің де жас адамның өміріне үлкен зиян тигізуі мүмкін екенін ескертті.
«Заң бәріне ортақ. Жауапкершілікті ерте жастан сезінген адам болашақта қателіктерден аулақ болады. Үлгілі тәртіп, адал еңбек пен үздік білім – нағыз азаматтың басты белгілері», – деп атап өтті ювеналдық полиция қызметкері.
Кездесудің соңында полиция қызметкерлері жастарға адамның өмірі мен денсаулығынан, құқықтары мен бостандығынан асқан ешқандай қымбат дүние жоқ екенін түсіндірді. Қоғамдағы әрбір азаматтың міндеті – бейбітшілік пен қауіпсіздікті сақтау.
«Қауіпсіз қоғам – ол әрқайсымыздың қолымызда. Әрбір студент өз орнында тәртіпті сақтап, жауапкершілікпен әрекет етсе, елімізде заңға бағынатын, қауіпсіз орта қалыптасады», – деді полицейлер.
Кездесу барысында студенттер белсенділік танытып, полицейлерге түрлі сұрақтар қойды. Оларды әсіресе:

• киберқылмыс пен интернеттегі қауіпсіздік;
• құқық бұзған жағдайда қолданылатын шаралар;
• полиция мен жастар арасындағы ынтымақтастық жолдары қызықтырды.

Полицейлер барлық сұрақтарға нақты мысалдармен жауап беріп, студенттерге құқықтық кеңестер берді.
Бұл кездесу студенттердің құқықтық сауатын арттыруда, олардың қоғамдағы орнын айқындауда маңызды қадам болды. Әсіресе жастарға заңды құрметтеу, тәртіпті сақтау, салауатты өмір салтын ұстану – болашақта табысты, үлгілі азамат болудың басты кепілі екені жан-жақты түсіндірілді.
Әл-Фараби аудандық полиция басқармасы мұндай кездесулерді алдағы уақытта да жалғастыра бермек. Себебі жастардың санасына құқықтық мәдениет пен отансүйгіштік қасиеттерді сіңіру – қауіпсіз қоғам қалыптастырудың негізгі жолдарының бірі.