«ОРДАБАСЫ» ФУТБОЛ ОРТАЛЫҒЫНЫҢ АЛАҢЫ ЗАМАНАУИ ТАЛАПҚА САЙ ЖАҢАРДЫ

Озық үлгіде қайта жабдықталған футбол алаңының салтанатты ашылу рәсіміне қатысқан қала әкімі Ғабит Сыздықбеков пен Қазақстан футбол федерациясының президенті Әділет Барменқұлов нысанның тұсауын кесіп, спортшыларға ізгі тілектерін жеткізді.
 Игілікті іс федерация мен «Ордабасы» футбол клубы арасында нысандарды жаңарту мақсатында қолға алынған «Алаң» жобасы аясында қолға алынған. Бір айда атқарылған құрылыс барысында футбол алаңына итальяндық үлгідегі газон төселіп,  алюминий қақпалар орнатылды.
 Қала басшысы мегаполисте бұқаралық спортты  қолдау бағытындағы жұмыстардың ауқымды екенін атап өтті.
 –  Қайырымдылық істің бастамашысы болған ҚФФ президентіне өз алғысымды білдіремін. Нысанда жаттығатын жастарымыздың әлемдік деңгейде көрінуіне тілектеспін. Бұқаралық спортты дамытуға жағдай жасауды жалғастырамыз, – деді қала әкімі.
 Соңғы үлгіде жабдықталған футбол алаңында 250-ге жуық жасөспірім жаттығады. Ауқымды жоба аясында биыл елімізде 4 футбол алаңын салу жоспарланған.
Балалар футболының белсенді дамуына қала әкімі қолдау көрсетуде. Заманауи футбол алаңдарын салуға қаржы бөліп, балалар командаларын қажетті құрал-жабдықтармен, жаттығу алаңдарымен қамтамасыз етеді. Әкім футбол бағдарламалары мен жаттығуларына демеушілік жасап, талантты жас ойыншыларды ынталандырады. Инфрақұрылымды дамыту және балалар турнирлерін өткізу жастар арасында салауатты өмір салтын және командалық рухты қалыптастыруға ықпал етеді. Футбол мектептерін құру және оқу орындарымен серіктестік білім мен спортты ұштастыруға мүмкіндік береді. Бұл бастамалар футбол дағдыларын дамыту үшін қолайлы ортаны қамтамасыз етеді, көшбасшыларды дамытады және қаладағы балалардың салауатты физикалық дамуын қолдайды.

Ақпарат көзі: Шымкент қаласы әкімінің баспасөз қызметі
Тілші: Шер-Али Шеримбетов