Шымкентте 300-ден астам отбасы баспаналы болды

Шымкентте 300-ден астам отбасы баспаналы болды

   Республика күні мерекесіне орай, Шымкент қаласында 304 отбасы жаңа қоныс тойын тойлады. Салтанатты кілт тапсыру рәсіміне қала әкімі Ғабит Сыздықбеков қатысып, қуаныш иелерін құттықтады. Бұл тұрғын үй Бозарық шағын ауданында орналасып, мемлекеттік бағдарламалар аясында «2-10-20» және «5-10-20» несиелік бағдарламалары арқылы берілді.

  Жаңа қоныстанушылар арасында ерекше қажеттіліктері бар балаларды тәрбиелеп отырған отбасылар, көпбалалы және толық емес отбасылар, мүмкіндігі шектеулі азаматтар, жетім балалар мен бюджеттік ұйымдардың қызметкерлері бар. Тұрғын үй қоры 304 пәтерден тұратын 8 көпқабатты үйді қамтиды, және тұрғындармен қазір сатып алу-сату келісім шарттары жасалуда.

  Бұған қоса, мемлекеттік бағдарлама аясында 400 пәтерлік 10 көпқабатты үйге конкурс өткізіліп жатыр. Сонымен қатар, жергілікті бюджет есебінен 311 отбасы қайтарымсыз әлеуметтік көмек ретінде тұрғын үй сертификаты арқылы баспанаға қол жеткізген. Жыл соңына дейін тағы 4 мыңнан астам пәтер беру жоспарланып отыр.

 Бұл мемлекеттік бағдарламалар еліміздің азаматтарының әлеуметтік жағдайын жақсартуға, олардың қолжетімді әрі жайлы тұрғын үйге ие болуына бағытталған маңызды қадам болып табылады. 
Тілші: Кенжебаева Гауһар