Шымкентте сапасыз салынған 1,4 млн теңгенің жол жабыны қайта төселді

Шымкентте сапасыз салынған 1,4 млн теңгенің жол жабыны қайта төселді

ШЫМКЕНТ. – Қалада жол құрылысы барысында анықталған 200-ден астам ақау қайта жөнделді. Өткен жылы Шымкентте жалпы ұзындығы 227 шақырым болатын автокөлік жолдарына күрделі және орташа жөндеу жұмыстары жүргізілген болатын. 247 көше мен 1 көпір пайдалануға берілді. Сонымен қатар, 79,3 шақырым жолға ағымдағы жөндеу жұмыстары жасалып, қаланың жол сапасын жақсарту бағытында ауқымды жұмыстар атқарылды.

Осының нәтижесінде, Шымкентте жақсы және қанағаттанарлық деңгейдегі жолдардың үлесі 75 пайызға жетті. Алайда, «Жол активтері сапасының ұлттық орталығы» РМК Шымкент қалалық филиалы құрылыс сапасын тексеру барысында 228 ақау мен кемшілікті анықтады.

Сапасыз материалдар мен қадағалау мәселелері

Тексеру кезінде 1494 жол-құрылыс материалы сараптамаға алынып, олардың 621-і нормативтік талаптарға сәйкес келмейтіні белгілі болды. Анықталған кемшіліктер бойынша мердігерлер мен техникалық қадағалау мекемелеріне тиісті шаралар қабылданды.

— Сәйкес келмеген жол-құрылыс материалдары бойынша сәйкестендіру жұмыстары жүргізілуде. Қазіргі уақытта бұл ақаулар бойынша мердігерлерге және техникалық қадағалаушыларға ескерту хаттары жолданды. Бір техникалық қадағалаушыға айыппұл салынды. Сонымен қатар, сапасыз салынған 1,4 млн теңгенің жол жабыны мердігер компанияның өз есебінен қайта төселді, — деді «Жол активтері сапасының ұлттық орталығы» РМК Шымкент қалалық филиалының бөлім басшысы Қайрат Шәкіров.

Жол сапасын жақсарту жұмыстары жалғасуда

Қала билігі алдағы уақытта мұндай жағдайларды болдырмау үшін құрылыс сапасын бақылауды күшейтуге ниетті. Жолдардың сапалы және ұзақ мерзімді қызмет етуін қамтамасыз ету мақсатында жаңа технологиялар енгізу жоспарланып отыр.

Сонымен қатар, қоғамдық бақылау да жол құрылысының сапасын арттыруға өз үлесін қоса алады. Тұрғындарға жол құрылысы барысында байқалған кемшіліктер туралы хабарлап, белсенділік танытуға шақыру жасалды.

Шымкент қаласы әкімдігі жол сапасын жақсарту бағытындағы жұмыстарды одан әрі жалғастыра отырып, 2025 жылға дейін қала жолдарының 85 пайызын жақсы және қанағаттанарлық деңгейге жеткізуді жоспарлап отыр. 
Тілші: Жүрсінбай Аружан Сабырқызы