7) Түркістан облысының автожол саласында жүйелі жемқорлық тәуекелдері анықталды

Түркістан облысының автожол саласында жүйелі жемқорлық тәуекелдері анықталды

   Сыбайлас жемқорлыққа қарсы іс-қимыл агенттігі және оның аумақтық департаменттері Түркістан облысында автожолдар саласындағы заңдылықты қамтамасыз ету бойынша тұрақты жұмыс жүргізіп келеді. Агенттіктің баспасөз қызметі хабарлағандай, облыс бойынша автомобиль жолдарын салу және жөндеу процестерін талдау нәтижесінде 2,2 миллиард теңгеге негізсіз шарттар жасалғаны анықталды.

  Әкімдіктер төтенше жағдайлар мен зияткерлік меншік объектілерін сатып алу қажеттілігі сылтауымен нақты мердігерлерді іріктеп алған. Бұл бәсекелестікке жатпайтын конкурстық процедураларды айналып өтуге мүмкіндік беріп, жұмыс тәжірибесі мен ресурстары жоқ фирмаларға артықшылық берді.

Сонымен қатар, орташа жөндеу жүргізуге арналған сметада негізсіз шығындар енгізіліп, бұл жолдардың 177 млн теңгеге қымбаттауына себеп болды. Ал жергілікті атқарушы органдар 210 млн теңгені талап етілмеген жобалау-сметалық құжаттама әзірлеуге жұмсады.

  Талдау қорытындысы бойынша заң бұзған тұлғалар жауапкершілікке тартылып, Түркістан облысының әкімдігі бюджеттік шығыстарды реттеу шараларын қабылдады. Және де жолдарды орташа жөндеу бойынша күтпеген шығыстарды алып тастап, қаржыландыру бөлінбестен жобалау-сметалық құжаттама әзірлеуге жол бермейтін заңнамалық өзгерістерге бастамашылық жасалды. 
Тілші: Кенжебаева Гаухар Жақыпқызы