8) Жошы рөлін сомдау үлкен жауапкершілік жүктеді — Ақ-Сұлтан Әнуарбек

Жошы рөлін сомдау үлкен жауапкершілік жүктеді — Ақ-Сұлтан Әнуарбек

  Түркістан сазды драма театрының ұсынған «Бөрте» қойылымы көпшіліктің үлкен қызығушылығын тудырып, сахнада жоғары кәсіби ойын көрсеткен актерлердің арқасында танымал болды. Шыңғысхан дәуіріндегі маңызды тарихи оқиғаларға негізделген қойылымда Жошы рөлін сомдаған Ақ-Сұлтан Әнуарбек ерекше көзге түсті. Ол рөліне үлкен жауапкершілікпен қарай отырып, өзінің кәсіби шеберлігін жоғары деңгейде көрсетіп, көрермендерден ыстық ықыласқа ие болды.

  Қойылымда Шыңғыс хан мен Бөртенің бала кезінен танысып, шаңырақ көтеруі, сондай-ақ сол дәуірдегі ұлы оқиғалар баяндалады. Жошы рөлі, әсіресе, бірнеше эпизодта көрініс береді, бірақ оның рөлі барлық қойылымға үлкен мағына беріп, Бөртенің тұңғыш ұлы туралы тұрақты ақпарат беріп отырады.

  Драматург Дулат Исабеков жазған пьесада Бөртенің Ұлы қағанның өміріндегі шешуші рөлі көрініс табады. Қойылымда 200-ден астам костюм тігілген, ал 19 актер басты рөлдерде өнер көрсетті, сонымен қатар, балет труппасы мен мультимедиалық технологиялар қойылымға жаңашылдық енгізді.

  Ақ-Сұлтан үшін бұл рөл үлкен сын болды, бірақ кәсіби маман ретінде ол барлық қиындықтарды жеңіп, көрермендердің қошеметіне бөленді. Ол Түркістан облысындағы Кентау қаласына қарасты Ащысай ауылында дүниеге келген. Т.Жүргенов атындағы колледжде білім алып, Павлодар қаласындағы Ж.Аймауытов атындағы театрда қызмет еткен. Түркістанға 2021 жылы қоныс аударған. 
Тілші: Түймебай Аяжан Лениншілқызы