Шымкентте миллиардтан астам тұратын спорт кешені мемлекетке қайтарылды

Шымкентте миллиардтан астам тұратын спорт кешені мемлекетке қайтарылды

Шымкент қаласындағы нарықтық құны 1 миллиард 214 миллион теңгеге бағаланған "Орталық су-спорт кешені" мемлекет меншігіне қайтарылды. 2017 жылы сатып алу құқығымен жекеменшікке берілген нысанға сегіз жыл ішінде ешқандай инвестиция салынбаған. Қабырғалары қақырап, едені опырылған, күйреуге шақ қалған кешенге прокурорлық тексеріс жүргізілген.

Тексеріс нәтижесінде кешеннің қауіпсіздік талаптарына сай келмейтіндігі анықталды. Сонымен қатар, басқарушы компанияның салықтық берешегі 111 миллион теңгеге жетіп, коммуналдық қарыздары да қордаланып қалған. Сот шешімімен барлық міндетті төлемдерді өтеуге бір ай мерзім берілді. Сондай-ақ, спортшыларды даярлауға бюджеттен бөлінген субсидияны қайтаруға міндеттелді.

Қазіргі таңда кешенді қайта жаңғырту үшін жобалық-сметалық құжаттама әзірленуде. Бұл нысанның қайтадан қала тұрғындарының игілігіне қызмет етуі үшін барлық қажетті шаралар қолға алынуда. Мемлекет меншігіне қайтарылуы кешеннің сақталуына және тиімді пайдаланылуына мүмкіндік береді. Болашақта бұл кешенде жас спортшылардың даярлануына және түрлі су спорт түрлері бойынша жарыстардың өткізілуіне жағдай жасалады деп күтілуде. 
Тілші: Жүрсінбай Аружан Сабырқызы