Түркістан облысында «Таза Қазақстан» бағдарламасы қарқын алуда

Түркістан облысында «Таза Қазақстан» бағдарламасы қарқын алуда

Мемлекет басшысы Қасым-Жомарт Тоқаевтың бастамасымен жүзеге асырылып жатқан «Таза Қазақстан» бағдарламасы Түркістан облысында жүйелі түрде жалғасуда. Экологияны қорғау, абаттандыру және тазалықты сақтау бағытындағы бұл бастама өңірде нақты нәтижелерге жетуді көздейді.

2025 жылы «Таза Қазақстан» бағдарламасы аясында Түркістан облысында 7 300-ге жуық сенбілік ұйымдастыру және 34 ауқымды іс-шараны қамтитын жоспар бекітілмек. Осы жоспарлардың жүзеге асырылуы облыс әкімінің бірінші орынбасары Зұлпыхар Жолдасовтың төрағалығымен өткен жиында талқыланды. Жиында тазалық шараларын жетілдіру бойынша ұсыныстар айтылып, жауапты тұлғаларға бірқатар нақты тапсырмалар берілді.

Экологиялық мәселелерді шешу – басымдық

Облыс әкімінің бірінші орынбасары рұқсат етілмеген орындарға қоқыс тастауды түбегейлі жоюды міндеттеп, тазалық мәдениетін қалыптастырудың маңыздылығын атап өтті.

– Бұл – Мемлекет басшысының бастамасымен қолға алынған өте маңызды шара. Өткен жылы облыста жақсы нәтижелерге қол жеткіздік. Алайда, жұмыстарды күшейтіп, нақты іске көшуіміз қажет. Жалпылама тапсырмалармен шектелмей, сауда орындарын ретке келтіру және тазалық жұмыстарына кәсіпкерлерді жұмылдыруға басымдық берілуі тиіс, – деді Зұлпыхар Жолдасов.

Абаттандыру мен көгалдандыру – басты назарда

Жиында облыстық энергетика және тұрғын үй-коммуналдық шаруашылық басқармасының басшысы Руслан Мұздыбеков атқарылатын жұмыстар туралы баяндады. Оның айтуынша, биыл ауыл-аймақтарды абаттандыруға ерекше назар аударылады. Атап айтқанда:

Демеушілер есебінен ауыл көшелерін жөндеу және тротуарлар салу;

Ойын алаңшалары мен стадиондарды жаңғырту;

Орындықтар орнату, шатырларды жөндеу және көшелерді жарықтандыру жұмыстары іске асырылады.

Сонымен қатар, тазалық, көгалдандыру және абаттандыру жұмыстарын күшейту мақсатында аудан және қала әкімдіктерінің қызметі арнайы 10 көрсеткіш бойынша бағаланатын болады. Жұмысты тиісті деңгейде орындамаған басшылардың жауапкершілігі қаралады.

Қоғамды жұмылдыру – табысты іске негіз

Бағдарламаның басты ерекшелігі – азаматтық қоғамды, кәсіпкерлерді және еріктілерді белсенді қатысуға тарту. Сауда орындарын тазарту және экологиялық мәдениетті қалыптастыру бағытындағы іс-шаралар көпшіліктің қолдауына сүйенеді. Бұл қадамдар өңірдің экологиялық ахуалын жақсартып қана қоймай, тұрғындардың өмір сапасын арттыруға да ықпал етеді.

Түркістан облысы басшылығы «Таза Қазақстан» бағдарламасын іске асыруды қатаң бақылауда ұстап, оның тиімді орындалуына ерекше көңіл бөлуде. Бұл бастама экологиялық тазалықты сақтауға бағытталған еліміздегі маңызды қадамдардың бірі болып табылады. 
Тілші: Жүрсінбай Аружан Сабырқызы