ШЫМКЕНТ ӘКІМІ АЭС САЛУ МӘСЕЛЕСІ БОЙЫНША РЕФЕРЕНДУМДА ДАУЫС БЕРДІ

Шымкент қаласының әкімі Ғабит Сыздықбеков «Түркістан сарайында» орналасқан сайлау учаскесінде АЭС салу мәселесі бойынша референдумда дауыс беруге қатысты.
Айта кетейік, Шымкентте 344 сайлау учаскесі ашылды, онда тұрғындар атом электр станциясын салу мәселесі бойынша өз пікірлерін білдіре алады.

Шымкентте 18 жасқа толған 660 563 тұрғын дауыс беру құқығына ие.Референдумға 344 учаске ашылды, оның 23-і жабық, бұл азаматтардың ерекше санаттары үшін дауыс беру мүмкіндігін қамтамасыз етеді.

Естеріңізге сала кетейік, бүгін бүкіл республика бойынша референдум өткізілуде. Республикалық референдумға бір ғана мәселе шығарылды.
Дауыс беруге арналған бюллетеньде «Сіз Қазақстанда атом электр станциясын салуға келісесіз бе?» деген сауал қойылады. Оған «иә» немесе «жоқ» деген жауаптар беріледі.

Референдум күні Шымкенттегі қоғамдық көліктер жолаушыларды тегін тасымалдайтынын атап өткен жөн, бұл учаскелерге баратын азаматтарға қолайлылықты қамтамасыз етеді.

Ақпарат көзі : Шымкент қаласы әкімінің баспасөз қызметі
Тілші: Алимбетов Азамат