9) ТҮРКІСТАН ОБЛЫСЫНЫҢ ӘКІМІ НҰРАЛХАН КӨШЕРОВ АРДАГЕРЛЕРМЕН ЖҮЗДЕСІП, ҰСЫНЫСТАРЫН ТЫҢДАДЫ

ТҮРКІСТАН ОБЛЫСЫНЫҢ ӘКІМІ НҰРАЛХАН КӨШЕРОВ АРДАГЕРЛЕРМЕН ЖҮЗДЕСІП, ҰСЫНЫСТАРЫН ТЫҢДАДЫ

   Түркістан облысының әкімі Нұралхан Көшеров ардагерлермен және зиялы қауым өкілдерімен өткен кездесуінде өңірдің дамуы туралы маңызды пікірлер мен ұсыныстар тыңдалды. Әкім аймақтың әлеуметтік-экономикалық жағдайын жақсарту үшін өңірдің белсенді азаматтарымен тығыз байланыс орнатуды маңызды деп санады. Бұл жиынның басты мақсаты – елдің бірлігі мен болашағын қамтамасыз ету үшін түрлі сала мамандары мен қоғамдық белсенділердің көзқарастарын ескеру.

  Кездесуде сөз алған ардагерлер мен қоғам қайраткерлері Түркістан облысының одан әрі дамуына бағытталған ұсыныстарын айтып, ұрпақ тәрбиесі, ел тұтастығын сақтау және өңірдің әлеуетін арттыру жөнінде ой-пікірлерімен бөлісті. Облыс әкімі өз кезегінде, аталған ұсыныстарды ескере отырып, өңірдің дамуына бағытталған жұмыстарды бірлесіп атқаруға дайын екендігін білдірді.

  «Батаменен ел көгерер» деген дана сөзге сүйенген Нұралхан Көшеров, ел ағаларының пікірлері мен ұсыныстарының маңызы өте зор екенін атап өтті. Бұл кездесудің нәтижесі Түркістан облысының әлеуметтік-экономикалық дамуында маңызды рөл атқаратын болады деп сенім білдірді. Жиынның соңында еңбек ардагері Сексенбай Тұрысбекұлы бата беріп, аймақ басшысына сәттілік тіледі.

  Бұл шара аймақтың дамуы мен халықтың әл-ауқатын арттыруға бағытталған ауқымды жұмыстардың бастамасы болып табылады. 
Тілші: Кенжебаева Гаухар Жақыпқызы