ТҮРКІСТАН: ЕРЕКШЕ ҚАЖЕТТІЛІГІ БАР ЖАНДАРҒА МЕМЛЕКЕТТІК ҚОЛДАУ ТҰРАҚТЫ КӨРСЕТІЛУДЕ

2025 жылдың алғашқы бес айында Түркістан қаласында ерекше қажеттілігі бар азаматтарға жан-жақты мемлекеттік қолдау көрсетіліп, әлеуметтік қорғау саласында елеулі нәтижелерге қол жеткізілді. Бұл бағытта атқарылған іс-шаралар әлеуметтік инклюзияны арттыруға және тұрғындардың өмір сүру сапасын жақсартуға бағытталған.

Қазіргі таңда қалада 12 031 мүмкіндігі шектеулі азамат тіркелген. Олардың 7583-і жеке оңалту бағдарламасына енгізіліп, тиісті көмекке қол жеткізді. Бұл – ерекше санаттағы азаматтардың өмір сүру деңгейін арттыруға бағытталған жұмыстардың жүйелі түрде жүзеге асып жатқанын көрсетеді. Жыл басынан бері мүмкіндігі шектеулі азаматтардан 6325 өтініш түсіп, оның 4033-і нақты оңалту құралдарымен қамтамасыз етілген. Бұл көрсеткіштердің әрқайсысы әлеуметтік қолдаудың нақты нәтижесін көрсетеді.

Атап айтқанда, протез-ортопедиялық құралдармен 374 адам қамтылды, сурдо және тифлотехникалық құрылғылар 203 адамға берілді, арнаулы жүріп-тұру құралдарын 227 адам алды, санаторлық-курорттық емге 654 азамат жіберілді. Сонымен қатар, жеке көмекші қызметін 267 адам тұрақты түрде пайдаланып отыр, ал ымдау тілі маманының қызметін 148 адам алған. Міндетті гигиеналық құралдар 2160 азаматқа берілген.

Осы көрсеткіштер инклюзивті қоғам құру жолындағы нақты қадамдарды білдіреді. Түркістан қаласында ерекше қажеттілігі бар азаматтардың құқықтарын сақтау, оларды қоғам өміріне белсенді тарту және әлеуметтік теңдік орнату бағытында мемлекеттік саясат табысты іске асырылып отыр.

Қаланың аумағында көлікпен қамту мәселесі де назардан тыс қалмаған. Бүгінде 11 инватакси қызмет атқарып, оны 211 адам тұрақты пайдаланады. Сонымен қатар, 4 әлеуметтік такси 51 азаматқа қызмет көрсетіп отыр. Ерекше қажеттілігі бар балалар үшін ашылған күндізгі қатынау орталығы 50 балаға тұрақты түрде қолдау көрсетуде.

Бұрынғы жылдармен салыстырғанда биылғы көрсеткіштер айтарлықтай жоғары. Мысалы, 2023 жылы оңалту қызметтерімен 5000-ға жуық азамат қамтылған болса, биыл бұл көрсеткіш 7583 адамға жетті. Ал протез-ортопедиялық, жүріп-тұру құрылғыларымен қамтамасыз ету деңгейі өткен жылдары 50–60% шамасында болса, 2025 жылы бұл көрсеткіш 90–100%-ға дейін артты. Бұл, сөзсіз, әлеуметтік қамтудың сапалы деңгейге көтерілгенін көрсетеді.

Сондай-ақ 2023 жылы қалада инватакси саны 5-тен аспаған және оған жүгінушілер саны 100-ден төмен болған. Ал қазіргі таңда екі есе көп адамға қызмет көрсетіліп отыр. Бұл жергілікті биліктің әлеуметтік инфрақұрылымды дамытуда қолға алған жүйелі шараларының тиімділігін дәлелдейді.

Қоғамдағы әлеуметтік теңдікке қол жеткізу үшін алдағы уақытта да жаңа жобалар мен бастамалар қолға алынбақ. Мысалы, санитарлық-курорттық емдеуге жолдама беру жүйесін жетілдіру, оңалту құралдарын жеткізудегі кедергілерді жою, қызметтердің сапасын арттыру жоспарланған. Сонымен қатар, ерекше қажеттілігі бар азаматтардың жұмысқа орналасуын жеңілдету, білім мен ақпаратқа қолжетімділігін кеңейту – келешекте шешімін табатын маңызды міндеттердің бірі.

Мемлекет тарапынан көрсетілетін бұл қолдаулар қоғамның барлық мүшесінің тең құқықта өмір сүруіне жағдай жасауға бағытталған. Түркістан қаласы осы бағыттағы жұмыстарды тұрақты жүргізіп, мүмкіндігі шектеулі жандардың әлеуетін толық ашуға мүмкіндік беретін жағдайларды қалыптастырып келеді.

Жалпы, 2025 жылдың алғашқы жартысында жүзеге асқан жұмыстар – әлеуметтік қамсыздандыру саясатының айқын нәтижесі. Түркістан қаласы әкімдігі мен жауапты мекемелер бұл бағытта алдағы уақытта да табанды түрде еңбек етпек. Жүйелі шаралар мен жоспарланған жобалар – ерекше қажеттілігі бар жандардың өмір сүру сапасын жақсартуға бағытталған нақты қадам.