САУРАНДА ҚҰС ФЕРМАСЫ ІСКЕ ҚОСЫЛАДЫ

Сауран ауданында ауыл шаруашылығы саласы жылдан-жылға қарқынды дамып келеді. 2025 жылдың алғашқы айларында өңірде 6,8 млрд теңгенің өнімі өндіріліп, жыл соңына дейін бұл көрсеткішті 102 млрд теңгеге дейін жеткізу жоспарланып отыр. Бұл мақсатта бірқатар ірі инвестициялық жобалар жүзеге асырылмақ. Солардың ішіндегі ең ауқымдысы – келесі жылы іске қосылатын, 280 мың басқа арналған құс фермасы. Шаға ауылдық округінде бой көтеретін бұл құс фермасы "Eco-Chicken" ЖШС-нің бастамасымен құрылып жатыр. Жобаның жалпы құны 2,5 млрд теңгеге бағаланып отыр.

Аудан әкімі Мақсат Таңғатаровтың айтуынша, өндіріс орны толық қуатына шыққан кезде тек Түркістан облысы көлемінде ғана емес, бүкіл еліміз бойынша құс етін таратып, экспорттық әлеуетті де арттыруға мүмкіндік туады. Бұл жобаның ерекшелігі – құс етін өнеркәсіптік негізде, заманауи технологияларды пайдалана отырып өндіру. Мұндай кешендер бұрын тек елдің солтүстік және орталық өңірлерінде қолға алынған болса, енді Түркістан облысында да іске асырылып отыр.

Аудан әкімінің мәліметінше, бұл жобамен қатар ауыл шаруашылығы саласында 13 ірі инвестициялық жоба жүзеге асырылады. Жалпы құны 16,4 млрд теңге болатын бұл жобалар жаңбырлатпалы суару жүйелерін енгізу, жылыжай кешендерін салу, мал бордақылау алаңдарын кеңейту сынды бағыттарды қамтиды. Мысалы, "Ақ Сауран" ЖШС 700 гектар жерге жаңбырлатпалы суару жүйесін орнатып, бұл жобаны 1,5 млрд теңгеге аяқтауды жоспарлап отыр.

Бұл жобалар бұрынғы жылдарда іске асырылған ұқсас бастамалардан ауқымы мен технологиялық жаңалығы жағынан ерекшеленеді. 2018–2020 жылдары аудан көлемінде бірнеше шағын жылыжайлар мен мал бордақылау орындары ашылған болатын. Алайда олардың өндірістік қуаты шектеулі болып, тек ауданның ішкі қажеттілігін өтеумен шектелді. Қазіргі қолға алынған жобалар болса, аудан экономикасына шынайы серпін беріп, экспорттық бағыттағы өнімдер шығаруға басымдық беріп отыр.

Ауданның 2030 жылға дейінгі даму жоспары да осы бағытта құрылған. Бұл жоспарға сәйкес, жалпы құны 209,3 млрд теңгеге бағаланған 254 инвестициялық жобаны іске асырып, 4 162 жаңа жұмыс орнын ашу көзделуде. Оның ішінде 2025 жылдың соңына дейін 30-ға жуық өндірістік орын ашу жоспарланған. Олар медициналық жиһаз, тұрмыстық химия, құрылыс материалдары, азық-түлік өнімдері сияқты түрлі тауарлар шығарады. Бұл кәсіпорындарға 100 млрд теңгеден астам инвестиция салынып, 1 500 жаңа жұмыс орны ашылады деп күтілуде.

Аудан халқы үшін мұндай жобалар жұмыспен қамту мен тұрмыс сапасын арттырудың нақты тетігіне айналуда. Бұрын ауыл жастары жұмыс таба алмай, қалаларға қоныс аударуға мәжбүр болса, қазір өз туған жерінде кәсіпке араласуға мүмкіндік алып отыр. Құс фермасының іске қосылуы осы тұрғыда үлкен әлеуметтік маңызға ие болмақ.

Тағы бір маңызды жайт – бұл жобалар инвестициялық серіктестік тетігі арқылы жүзеге асырылып жатыр. Яғни, жергілікті атқарушы билік пен жеке инвесторлар күш біріктіріп, ортақ жауапкершілік аясында жұмыс істеуде. Жоба барысында жергілікті тұрғындардың да қатысуы қарастырылған. Бұл тәсіл бұрынғы жылдардағы таза мемлекеттік қаржыландыруға негізделген жобалардан ерекшеленеді. Жаңа жүйе бәсекеге қабілеттілік пен нарықтық талаптарға сай тиімділікке қол жеткізуді көздейді.

Құс фабрикасының іске қосылуы тек ауданға ғана емес, бүкіл Түркістан облысына жаңа агроиндустриялық бағыт әкеледі. Өнімнің сапасы мен көлемі оны шетел нарығына да шығару мүмкіндігін береді. Бұған қоса, ауыл шаруашылығы өнімдерінің ішкі нарықтағы бағасын тұрақтандыруға, азық-түлік қауіпсіздігін нығайтуға да ықпал етеді. Бұл бастама Қазақстанның агроөнеркәсіп кешеніндегі ірі жаңалықтардың бірі ретінде бағалануға лайық.

Соңғы жылдары елімізде агросекторда сандық технологияларды енгізу, үлкен көлемдегі өндірістік кешендер ашу секілді үрдістер белең алып келеді. Сауран ауданындағы құс фермасы осы ұлттық стратегиялық бағытпен үндесіп жатыр. Аудан басшылығы мен инвесторлар күш біріктіріп, өңір экономикасының құрылымын мықтап қалыптастыруда. Бұл тек бір ауданның емес, жалпы еліміздің азық-түлік саясатына қосылған сүбелі үлес болмақ.