7) ТҮРКІСТАН: Инфрақұрылым саласында 160-тан астам жоба іске асырылады

ТҮРКІСТАН: Инфрақұрылым саласында 160-тан астам жоба іске асырылады

  Түркістан облысында инфрақұрылымды дамыту жұмыстары ауқымды түрде жүзеге асырылуда. 2025 жылға дейін ауыз су, газбен қамтамасыз ету, электр энергиясын жеткізу және жылыту мәселелерін шешу жоспарлары бекітілген. 160-тан астам жаңа нысанның құрылысы басталады, оның ішінде ауыз су, газдандыру, электрмен қамту және жылу жүйелерін жетілдіру шаралары қолға алынған.

  Облыс әкімі Нұралхан Көшеровтың төрағалығымен өткен жиында жауапты мекеме басшылары мен әкімдерге нақты тапсырмалар берілді. Ауыз су мәселесін шешу мақсатында 2025 жылға дейін 47 су нысанының құрылысын аяқтау жоспарланған, ал биыл 30 елді мекеннің жобалау-сметалық құжаттамасы әзірленіп, қаржыландыруға ұсынылды. Түркістан облысының 30 мыңға жуық тұрғыны орталықтандырылған ауыз сумен қамтылатын болады.

  Газдандыру жұмыстары да жалғасып, биыл 25 нысанның құрылысы аяқталса, келесі жылы 22 нысанның құрылыс жұмыстары іске асырылатын болады. Сонымен қатар, облыс тұрғындары 41 жаңа электр нысанымен қамтамасыз етіледі. Түркістан, Келес, Мақтарал және басқа да аудандардағы тұрғындар тұрақты электр қуатымен қамтылып, қажетті инфрақұрылымдық жобалар іске қосылуда.

  Жылыту маусымы штаттық режимде өтіп жатыр, барлық тұрғын үйлер мен бюджеттік мекемелер тұрақты жылумен қамтамасыз етілген. Сонымен қатар, облыс тұрғындарын ауыз сумен, газбен, сапалы электр энергиясымен және тиімді жылумен қамту басты міндет болып қала береді.

  Президент Қасым-Жомарт Тоқаевтың тапсырмасына сәйкес, 2025 жылдың соңына дейін барлық елді мекендер таза ауыз сумен қамтамасыз етілетін болады. Облыс басшысы бұл бағыттағы жұмыстарды бақылауды жалғастырып, инфрақұрылымдық мәселелерді шешуде жүйелі жұмыс істелетінін атап өтті. 
Тілші: Кенжебаева Гаухар Жақыпқызы