2) Шымкентте аудандық прокуратура ғимараты ашылды

Шымкентте аудандық прокуратура ғимараты ашылды

  Шымкент қаласында күрделі жөндеуден кейін Әл-Фараби ауданының прокуратурасы ғимараты салтанатты түрде ашылды. 25 қарашада өткен ашылу салтанатына Қазақстан Республикасы Бас Прокурорының орынбасары Ғалымжан Қойгелдиев қатысты.

  Ашылу барысында Бас Прокурордың орынбасары ұжымды құттықтап, жаңа ғимаратта жұмыс істейтін прокуратура қызметкерлеріне жасалған жағдайлар азаматтардың құқықтарын қорғауда жоғары деңгейде еңбек ету үшін мемлекет пен қоғамның сенімінің белгісі екенін атап өтті. Ол әрбір қызметкерге еңбек тәртібін қатаң сақтап, міндеттерін адал және мұқият орындау қажеттігін ескертті.

  Әл-Фараби ауданының прокуратурасы ғимаратына 5-ші ауданның құрылуына байланысты күрделі жөндеу жұмыстары жүргізіліп, ғимарат прокуратураның есебіне берілді. Ғимаратта 47 қызметтік бөлме, мәжіліс залы, жауап алу бөлмелері және басқа да қажетті инфрақұрылымдар қарастырылған. Сонымен қатар, оның материалдық-техникалық жабдықтары қазіргі заманның талаптарына толық сәйкес келеді, бұл өз кезегінде халықтың қажеттіліктерін жоғары деңгейде қамтамасыз етуге мүмкіндік береді.

  Шымкент қаласының прокуроры Ғабит Мұқанов жаңа ғимараттың азаматтардың құқықтарын тиімді қорғау үшін барлық жағдайды қамтамасыз ететінін атап өтті. 
Тілші: Кенжебаева Гаухар Жақыпқызы