Түркістан облысында білім саласында 2,4 млрд теңге қаржы жымқырылды: 43 лауазымды тұлға күдікке ілінді

Түркістан облысында білім саласында 2,4 млрд теңге қаржы жымқырылды: 43 лауазымды тұлға күдікке ілінді

Түркістан облысы Мақтарал ауданындағы білім бөлімінде 2,4 миллиард теңге көлемінде қаржы жымқырылғаны белгілі болды. Бұл туралы облыстық прокуратура хабарлады. Қазіргі таңда Мақтарал ауданы білім бөлімінің 43 лауазымды тұлғасы мен жауапты қызметкерге қатысты қылмыстық іс қозғалған.

Прокуратураның мәліметіне сәйкес, жымқырылған қаражаттың басым бөлігі білім саласында жұмыс істемейтін тұлғалардың есепшоттарына заңсыз жалақы аудару арқылы алынған. Қаржының бір бөлігі мемлекетке қайтарылғанымен, қазірге дейін тек 333,5 миллион теңге ғана қайта төленген. Сонымен қатар, қылмыстық жолмен алынған 649,7 миллион теңге құны бар мүліктеріне тыйым салынды.

Прокуратура өкілдерінің айтуынша, қазірге дейін мемлекетке 1 миллиард теңге көлемінде залал қайтарылып, тергеу жұмыстары жүргізілуде. Қылмыстық іс сотқа жолданған, ал кінәлілердің жауапкершілігі анықталатын болады. Бұл оқиға білім саласындағы сыбайлас жемқорлық мәселелеріне қарсы күрестің маңыздылығын тағы да дәлелдейді. 
Тілші: Жүрсінбай Аружан Сабырқызы