Елордада Жеңістің 80 жылдығына арналған әскери-патриоттық жарыс өтуде

  Ұлы Отан соғысындағы Жеңістің 80 жылдығына орай елордада мектеп және колледж оқушылары арасында пневматикалық винтовкадан атудан аудандық және қалалық деңгейдегі жарыстар ұйымдастырылды. Іс-шара Астана қаласындағы «Батырлар» әскери-патриоттық орталығының аумағында өтіп жатыр.
  Жарыстың басты мақсаты – жас ұрпақты патриоттық рухта тәрбиелеу, Ұлы Жеңіс естелігін құрметтеу және салауатты өмір салтын насихаттау. Сонымен қатар, бұл турнир жастардың әскери дағдыларын шыңдап, командалық рухты қалыптастыруға бағытталған.
  – Жарысымыз екі кезеңнен тұрады. Қазір Сарайшық ауданы мектептерінің оқушылары пневматикалық винтовкадан атудан өзара жарысуда. Әр мектептен екі ұл мен екі қыздан құралған төрт адамдық командалар сынға түсуде. Аудандық кезең жеңімпаздары қалалық турда бақ сынайды. Бұл – өте қызықты әрі маңызды турнир. Жігіттер бір жыл бойы дайындалды, олардың арасында арнайы әскери дайындық мамандары болмаса да, жоғары нәтижелер көрсетіп жатыр, – деді «Өркен» балалар мен жасөспірімдер туризмі және спорттық-физикалық тәрбиесі орталығының өкілі Данияр Теміртасов.
  Іс-шара жас буынның бойында елжандылық, жауапкершілік және тәртіп сияқты қасиеттерді дамытуға ықпал етуде. Жарыстың келесі кезеңі – қалалық финал – жақын күндері өтеді деп жоспарлануда.
  Қорытындылай келе, мұндай әскери-патриоттық жарыстар жас ұрпақты елін сүйетін, жауапкершілікті сезіне алатын, тәртіпті азамат етіп тәрбиелеуде үлкен рөл атқарады. Жеңістің 80 жылдығына орай ұйымдастырылған бұл іс-шара – тарихқа тағзым ғана емес, болашаққа сенімді ұрпақ қалыптастыру жолындағы маңызды қадам. Жастардың белсенділігі мен ынтасы олардың бойында отансүйгіштік сезімнің мықтап қалыптасып келе жатқанын көрсетеді.

Тілші: Алимбетов Азамат