ТҮРКІСТАН ОБЛЫСЫНА 7 ЖЫЛ: ЖАҢА ИНФРАҚҰРЫЛЫМ
Түркістан облысы жаңадан құрылғаннан бері өңірдің инфрақұрылымын жақсартуға бағытталған ауқымды жұмыстар жүйелі түрде жүзеге асырылып келеді. 2018 жылы облыс мәртебесін алған Түркістан өңірі бүгінгі күні заманауи талаптарға сай инфрақұрылыммен қамтамасыз етіліп, ауыл-аймақтардағы өмір сапасы айтарлықтай жақсарды. Соңғы жеті жылда бірқатар бағыттар бойынша күрделі мәселелер шешімін тауып, өңір тұрғындары күнделікті қажеттіліктерге қол жеткізе бастады.Ауыз сумен қамтамасыз ету мәселесі – халық үшін ең маңызды салалардың бірі. Соңғы жылдары облыс аумағында ауыз су жүйелері мүлдем болмаған 30 елді мекенге жаңадан су құбыры тартылды. Сонымен қатар, ескіріп, істен шыққан су жүйелері бар 13 ауылда толық жаңарту жұмыстары жүргізілді. Соның нәтижесінде Түркістан облысында ауыз сумен қамтылған елді мекендердің саны 767-ге жетіп, бұл көрсеткіш халықтың 95,9 пайызына сәйкес келеді. 2025 жылға дейін тағы 30 елді мекенге су жүйесін жеткізіп, 801 ауылдың барлығын толық ауыз сумен қамту жоспарланған.
Табиғи газбен қамтамасыз ету бағытында да ілгерілеу бар. 2018-2024 жылдар аралығында 115 газ нысанының құрылысы аяқталып, 563 ауыл көгілдір отынға қосылды. Нәтижесінде, шамамен 1,8 миллион адам табиғи газ тұтынуға мүмкіндік алды. Бұл қамту деңгейі 69,7 пайызды құрайды. 2025 жылға дейін қосымша 45 ауыл газбен қамтамасыз етіледі деп жоспарлануда. Бұның арқасында табиғи газбен қамтылған елді мекендер саны 597-ге дейін артып, жалпы қамту деңгейі 73,9 пайызға жетеді.
Кентау қаласындағы 100 жылға жуық тарихы бар жылу орталығы да жаңарту жұмыстарынан өтті. Бұған дейінгі жағдайында орталықтың 85 пайызы тозған болатын. Осыған байланысты 6 қазандыққа қайта құру жүргізіліп, 6,6 шақырым магистралды жылу құбыры толық жаңартылды. Алдағы уақытта мемлекеттік-жеке меншік әріптестік аясында 148 миллиард теңге көлемінде инвестиция тартылып, жаңа газ турбиналы станция салу жоспары тұр. Бұл жоба аясында 240 мегаватт электр энергиясы және 160 гигакалорий сағатына жылу қуаты өндірілетін болады.
Электр қуатымен қамтамасыз ету мәселесі де күн тәртібінен түскен емес. Қазіргі таңда Түркістан облысындағы ауылдардың 98 пайызы орталықтандырылған электр желісіне қосылған. Қалған 16 ауыл шалғай орналасуына байланысты күн панельдері, дизельді генератор секілді баламалы қуат көздерін пайдаланып отыр. 2024 жылы 44 ауыл сапалы электр желісімен қамтылды. Жыл соңына дейін тағы 93 ауыл электр қуатымен қамтамасыз етіледі.
Электр тапшылығын шешу үшін “Самұрық-Қазына” ұлттық әл-ауқат қорымен бірлесіп, 1000 мегаватт бу-газ қондырғы станциясын салу жобасы қолға алынған. Бұл жоба өңірдің энергетикалық қауіпсіздігін нығайтуға және өнеркәсіптік аймақтарды тұрақты қуатпен қамтуға мүмкіндік береді. Қазіргі таңда құрылыс жұмыстары басталып кетті.
Бұл жетістіктерді алдыңғы жылдармен салыстырғанда, нақты прогресті байқауға болады. Мәселен, 2021 жылы облыс аумағындағы ауылдардың тек 717-сі ғана ауыз сумен қамтамасыз етілсе, газбен қамтылған елді мекендер саны 457 болатын. Электр қуаты бойынша да тек 80-85 пайыз деңгейінде орталық жүйеге қосылған еді. 2022 жылы қосымша 96 су нысаны іске қосылып, 30 ауыл нақты қамтылды. Газдандыру бойынша 14 миллиард теңгеден астам қаржы бөлініп, ондаған ауылға газ жеткізілді. Ал электр қуатымен 13 ауылға жаңартылған желілер тартылған.
Осылайша, 2025 жылға қарай Түркістан облысында инфрақұрылым саласында жүйелі жоспарлау, тиімді инвестициялар және нақты орындалған жобалардың арқасында сапалы серпіліс байқалады. Әлеуметтік жағдайдың жақсаруы халықтың өмір сүру деңгейіне оң ықпал етіп, өңірдің даму қарқынын үдетті. Бұл бағыттағы жұмыстар әлі де жалғасып, шалғай ауылдар мен әлеуметтік нысандарды сапалы инфрақұрылыммен қамту басты басымдық ретінде қала бермек.
Тілші Тогжан Габидинова
Обсудить
Другие статьи:
БАСПАСӨЗ – ХАБАРЛАМА
04 Желтоқсан 2025, Бейсенбі
ПРЕСС-РЕЛИЗ
04 Желтоқсан 2025, Бейсенбі
Шымкентте студенттер экологиялық бастамаларды талқылады
03 Желтоқсан 2025, Сәрсенбі
Похожие материалы:
Комментарии (0)