Инновациялық-технологиялық колледжінде «Заң және тәртіп» және «Нашақорлықтың зияндылығы» тақырыбында кездесу өтті

2025 жылдың 23 қыркүйегінде Шымкент қаласындағы Инновациялық-технологиялық колледжінде студент жастардың құқықтық мәдениетін арттыру және зиянды әдеттердің алдын алу мақсатында маңызды кездесу ұйымдастырылды. Кездесудің негізгі тақырыптары – «Заң және тәртіп» және «Нашақорлықтың зияндылығы».
Іс-шараға Шымкент қаласы Психикалық денсаулық сақтау орталығының психиатр-наркологы Баймурынова Раушан Асанқызы, Шымкент қаласының Әділет департаментінің бас маманы Бахтияр Самал, Полиция департаментінің Есірткі қылмыстарына қарсы іс-қимыл басқармасының полиция майоры Садыков Ердәулет Пардахожаұлы, сондай-ақ «Серғали» Түркістан аймақтық қоғамдық бірлестігінің жоба үйлестірушісі Абутәлиев Ержан Абдыфаритұлы қатысып, студенттерге жан-жақты түсіндірме жұмыстарын жүргізді.
Жастар – еліміздің болашағы. Сондықтан олардың құқықтық сауатын арттыру, заң талаптарын құрметтеуіне ықпал ету және салауатты өмір салтын насихаттау – қоғам алдындағы маңызды міндеттердің бірі. Бұл кездесудің басты мақсаты – студенттерге заң талаптарын түсіндіру, құқық бұзушылықтың алдын алу және нашақорлықтың зиянды әсері туралы кеңінен ақпарат беру болды.
Алдымен сөз алған Шымкент қаласының Әділет департаментінің бас маманы Бахтияр Самал жастарға Қазақстан Республикасының заңдары туралы кеңінен баяндап берді. Ол азаматтардың құқықтары мен міндеттері, құқықтық мәдениеттің қоғамдағы орны туралы түсіндірді. Әсіресе жастар арасында жиі кездесетін әкімшілік құқық бұзушылықтар, мысалы, ұсақ құқық бұзушылықтар, қоғамдық тәртіпті бұзу, әлеуметтік желілерде заңға қайшы әрекеттер жасау мәселелеріне ерекше тоқталды.
Бахтияр Самал жастардың саналы түрде заңды құрметтеп, құқықтық тәртіпті сақтауы қоғам тұрақтылығы мен ел болашағы үшін аса маңызды екенін атап өтті. «Заңды білу – әр азаматтың парызы, ал оны орындау – қоғам алдындағы жауапкершілік», – деп түйіндеді ол.
Кездесудің келесі бөлімінде Шымкент қаласы Психикалық денсаулық сақтау орталығының психиатр-наркологы Баймурынова Раушан Асанқызы студенттерге есірткі заттарының адам денсаулығына тигізетін орасан зияны туралы жан-жақты ақпарат берді. Ол нақты мысалдар келтіре отырып, есірткінің жүйке жүйесіне, мидың қызметіне, жүрек пен бауырға тигізетін залалын түсіндірді.
«Есірткі – адам өмірін бұзатын, болашағын құрдымға кетіретін қауіпті зат. Оның кесірінен денсаулық қана емес, отбасы, оқу, еңбек, достық қарым-қатынас сияқты өмірдің барлық саласы зардап шегеді», – деді маман.
Сонымен қатар ол жасөспірімдер мен жастардың есірткіге елігу себептері – қызығушылық, достардың ықпалы, интернет арқылы таралатын теріс насихат екенін айтып өтті. Раушан Асанқызы жастарды әрдайым сақ болуға, қажет болған жағдайда психологтар мен нарколог мамандардың көмегіне жүгінуге шақырды.
Полиция департаментінің Есірткі қылмыстарына қарсы іс-қимыл басқармасының полиция майоры Садыков Ердәулет Пардахожаұлы сөз алып, есірткіге қатысты қылмыстардың қазіргі қоғамдағы ахуалына тоқталды. Ол жастарды күмәнді ұсыныстардан аулақ болуға, интернет арқылы заңсыз таралатын жарнамаларға сенбеуге шақырды.
Полиция майорының айтуынша, бүгінде есірткі қылмыстары көбіне әлеуметтік желілер мен мессенджерлер арқылы жасырын түрде жүзеге асырылады. «Заң алдында бәрі тең. Есірткі саудасына қатысқан немесе оны тұтынған кез келген азамат заңға сәйкес жауапкершілікке тартылады», – деді ол.
Сонымен қатар, полиция өкілі студенттерге заңды бұзбаудың, тәртіпті сақтаудың маңыздылығын жеткізіп, «Жастардың болашағы – біздің елдің болашағы. Әрбір жас заңды құрметтеп, адал еңбекпен өмір сүрсе, қоғамымыз да қауіпсіз әрі тұрақты болады», – деп атап өтті.
Кездесуге арнайы шақырылған «Серғали» Түркістан аймақтық қоғамдық бірлестігінің жоба үйлестірушісі Абутәлиев Ержан Абдыфаритұлы жастарға өмірлік ұстанымдар мен дұрыс орта таңдаудың маңызы туралы айтты. Ол қоғамдық ұйымдардың есірткіге қарсы күресте, жастарға қолдау көрсетуде маңызды рөл атқаратынын атап өтті.
«Жастардың бос уақытын тиімді пайдалану, спортпен, мәдени шаралармен айналысуы – нашақорлықтың алдын алудың ең тиімді жолдарының бірі. Әрбір жас өз болашағына жауапты екенін ұмытпауы керек», – деді ол.
Іс-шара барысында студенттер өздерін қызықтырған сұрақтарын қойып, мамандардан нақты жауап алды. Кейбір жастар құқықтық мәселелер жөнінде сұрақ қойса, басқалары есірткіден қорғанудың жолдары туралы пікір алмасты.
Кездесуді қорытындылай келе, ұйымдастырушылар мұндай шаралардың жастар тәрбиесінде, құқықтық мәдениетін қалыптастыруда, салауатты өмір салтын насихаттауда ерекше маңызы бар екенін атап өтті.
23 қыркүйекте өткен кездесу студенттерге ой салып қана қоймай, олардың болашақ өмірлік таңдауларына бағыт-бағдар берді. Құқықты құрметтеу, заңға бағыну және есірткіден аулақ болу – әрбір жастың басты міндеті екені тағы бір мәрте еске салынды.