Түркістан облысында 100-ден астам мектеп жаңғыртудан өткізіледі

Түркістан облысында 100-ден астам мектеп жаңғыртудан өткізіледі

Түркістан облысында білім, денсаулық сақтау және әлеуметтік нысандарды салу мен жөндеу жұмыстары белсенді түрде жүргізілуде. Облыс әкімінің орынбасары Бейсенбай Тәжібаевтың төрағалығымен өткен мәжілісте осы салалардағы құрылыс жұмыстары мен алдағы міндеттер талқыланды. Әкімнің орынбасары жауаптыларға құрылыс жұмыстарын сапалы әрі уақтылы орындауды тапсырды.

Мемлекет басшысы өз Жолдауында еліміздегі 1 300 мектепті жаңғырту жөнінде тапсырма берген болатын. Түркістан облысы бұл бастаманы қолдап, жаңғырту жобасына 115 мектепті енгізді. 2025-2027 жылдар аралығында осы мектептердің ғимараттарына күрделі және ағымдағы жөндеу жұмыстарын жүргізу жоспарланған. Биыл облыста 41 мектепте жөндеу жұмыстары қолға алынбақ.

Өткен жылы бюджет есебінен облыста 50 мектептің құрылысы басталып, 26-сы пайдалануға берілген. Қалған 24 мектептің құрылысын биылғы жоспар бойынша тамыз айына дейін аяқтау қажет. Ал 2025 жылға дейін тағы бірнеше жаңа мектептер салынуы күтілуде. Облыс әкімінің орынбасары құрылыс нысандарындағы жұмыстардың сапасын қатаң бақылауда ұстауды тапсырды.

Түркістан облысының білім басқармасының орынбасары Жандос Нұрпейісовтің мәліметі бойынша, өңірде 1082 орта білім беру мекемесі бар, онда 554 753 оқушы білім алуда. Облыс мектептерінің көпшілігі типтік ғимараттарда орналасқан, алайда 124 мектепте ғимараттар ыңғайластырылған. Қазіргі таңда 5800 орынды 24 жаңа мектептің құрылысына қажеттілік бар. Сонымен қатар, мемлекеттік-жекешелік әріптестік аясында 7200 орынды 17 мектеп салу жоспарлануда. Жалпы, 2025-2027 жылдары 12000 орынды 41 мектептің құрылысы жоспарланған.

Сондай-ақ, өңірде 2025 жылы күрделі жөндеуді қажет ететін 26 мектептің 3-еуіне «Ауыл – Ел бесігі» бағдарламасымен, қалған 23-іне облыстық бюджет есебінен қаржы бөлінген. Жұмыстардың уақытылы әрі сапалы орындалуы, сондай-ақ барлық мектептердің қауіпсіздігі мен жайлылығын қамтамасыз ету мақсатында барлық құрылыс нысандары мұқият бақылауда болады. 
Тілші: Жүрсінбай Аружан Сабырқызы