10) Түркістан облысында машина жасау өнеркәсібі дамытылады

Түркістан облысында машина жасау өнеркәсібі дамытылады

  Түркістан облысында машина жасау саласы бойынша ауқымды жобалар жүзеге асырылуда. Өңірде шағын габаритті арнайы техника мен коммуналдық жабдықтар шығаратын өндіріс орны ашылып, бұл жоба биыл іске қосылады деп жоспарлануда. Облыс әкімі Нұралхан Көшеров өңірдегі инвестициялық жобалар аясында «SPK Turkistan» өндірістік паркінде болып, Сауран ауданындағы «BNK GROUP LTD» кәсіпорнына барды. Бұл зауыт жылына 1 мың арнайы техника шығаруды көздейді, сонымен қатар жаңбырлатып суару машиналарын шығару бойынша Қазақстанда алғаш болып басталған өндіріс орындарының бірі болып табылады.

  Кәсіпорын америкалық «Nelson Irrigation» компаниясымен бірлесіп, айналмалы және фронтальды жаңбырлатқыш машиналарды шығарады. Бұл жобаның маңызы зор, себебі ол 2030 жылға дейін Түркістан облысында су үнемдеу технологиясын 216,3 мың гектар жерге енгізуге мүмкіндік береді.

  Сонымен қатар, облыс әкімі тоңазытқыш және мұздатқыш жабдықтарын өндіретін «Jasyl suyq Qazaqstan» кәсіпорнының өндіріс алаңымен танысты. Бұл кәсіпорын болгариялық «UBC Group» холдингімен бірлесіп екі ірі өндіріс желісін ашуды жоспарлап отыр. Алғашқы кезеңге 5 млн еуро көлемінде инвестиция салынып, өндіріс алаңында 350 жұмыс орны ашылады. Сонымен қатар, айына 10 мыңға дейін тоңазытқыш жабдығы шығарылып, 1000 адамды жұмыспен қамту жоспарлануда.

  Өндірістік парк аумағында сауда және қызмет көрсету мақсатында арнайы ғимараттар мен көрме орталығы салынады. Бұл жобаның жүзеге асуы үшін барлық жағдай жасалады, ал құрылысы еуропалық стандарттарға сәйкес жүргізіледі. Парк аумағында 100 гектар жерге 151 ғимарат салынады, оның алғашқы 30 гектарында инфрақұрылым мен коммуникациялар орнатылған.

  Жалпы, өткен жылы 36,5 миллиард теңге көлемінде 8 өндіріс іске қосылып, 712 жаңа жұмыс орны ашылды. 2025-2026 жылдары өндіріс алаңының екінші кезеңінде тағы да 70 гектар аумаққа 112 ғимарат тұрғызу жоспарланып отыр. Бұл жобалар облыстың әлеуметтік-экономикалық дамуына үлкен үлес қосатыны сөзсіз. 
Тілші: Кенжебаева Гаухар Жақыпқызы